Deputetët e Partisë Demokratike kanë kërkuar që në Komisionin Parlamentar për Politikën e Jashtme të diskutohet nisma e “Open Balkan”. Gjatë fjalës së tij, deputeti demokrat Kreshnik Çollaku e ka konsideruar nismën si një veprim mjaft të rëndë që ka cënuar marrrëdhëniet me Kosovën, ndërsa e cilëson si një projekt për hegjemoninë serbe dhe jo projekt bashkëpunimi.
“’ Open Balkan është modeli i ri për mbijetësen e serbëve në Ballkan. Çudia më e madhe është se ky projekt është projekt i Beogradit. Nuk është një shpikje e kryeministrit Rama dhe ai bën sikur është një ide e tij. Këtu kemi politikanë shumë të vjetër. Janë dëshmitarë të konflikteve më të mëdha në Shqipëri, por në 30 vite kanë pasur në një mendim të përbashkët, vetëm për Kosovën. Çfarë ndodhi që në historinë tonë ka një konflikt kaq të madh me Kosovën. Si ka mundësi që nuk konsultohen me Kosovën? Si e vë firmën në një konfederatë, si vihet firma me mendjen e një kryeministrit. Ore kanë hall ata njerëz, i njohin veprimet e serbëve. Prisni se nuk ka mbaruar, do të ketë të tjera provokime. Si mundet ne të shpallim paqe me dikë që masakron Kosovën si diplomatikisht si në mënyra të tjera”, ka thënë ai.
Kryetarja e këtij komisioni, Mimi Kodheli tha se për të thirrur në komision ministren për Europën dhe Punët e Jashtme, duhet të mblidhen firmat.
“Mblidhni firmat dhe kërkoni ministrin në Komision për të diskutuar ‘Open Balkan’”, tha Kodheli.
Ndërsa deputetja Grida Duma, gjithashtu pjesëmarrëse në Komision kërkoi informacion se sa fonde ka fituar Shqipëria nga këto projekte.
“Unë nuk kam asnjë drojë që herë pas here të dal pak nga aura e politikës së madhe dhe të shkojmë te lakmuesi që i tregojmë perëndimit se si dimë ne të sillemi në progres raportet. Do preferoja që të shihja në memon tuaj se cili ishte impakti i turizmit. A kemi bërë ne një draft apo strategji që mos të vijojmë te mbetemi të fondet e paralokuara? Jemi pas 8-9 vitesh në të njëjtin nivel, apo kemi arritur që të jemi më afër hyrjes në BE, që të tërheqim më shumë fonde. Këto projekte si vazhdojnë dhe menaxhohen nga institucionet publike”, tha Duma.
Në mbledhjen e sotme të Konferencës së Kryetarëve, u miratua kërkesa e opozitës për zhvillimin e mbledhjeve të Komisioneve fizikisht, dhe jo online.
