Të gjithë deputetët dhe drejtuesit e PD-së së drejtuar nga Sali Berisha, ish-Kryeministri që prej 30 dhjetorit 2023 ndodhet në “arrest shtëpie” me vendim të GJKKO, do të zbresin në bazë dhe do të takohen me qytetarët. Ky është një nga vendimet e marra në mbledhjen e Kryesisë së kësaj partie.
Pas protestës së 20 shkurtit, duket se demokratët do të kalojnë në një etapë të re, atë të takimeve me qytetarët dhe vijimin e aksionit opozitar, me një kërkesë të prerë: krijimin e një qeverie teknike.
“Ai lum njerëzish, ai uragan popullor i dha një mesazh edhe PD-së, dhe kryesia jonë sot vendosi që ta lexojë dhe deshifrojë mirë dhe qartë, atë mesazh të njerëzve të lirë, demokratëve, opozitarëve që morën pjesë, edhe të paangazhuarve që morën pjesë, edhe të socialistëve të zhgënjyer dhe të shkelur me këmbë nga sekti i rilindjes, që morën pjesë.
Përkthimi i atij mesazhi është që ne do të zbresim në bazë, të gjithë do të zbresim të takojmë të gjithë qytetarët, pensionistët, fermerët, arsimtarët, mjekët, nënpunësit, të papunët, rininë.
Do të jemi çdo ditë në kontakt me ta, për të drejtuar gjithë këtë energji njerëzore dhe për ti dhënë një mundësi çlirimi gjithë kësaj energjie, që Shqipëria më në fund të shkojë në zgjedhje të lira dhe demokratike, me një qeveri teknike dhe jo më, me një qeveri që është armike e votës së lirë”, tha Flamur Noka.
Ai tha se McGonigali në SHBA u dënua, ndërsa në Shqipëri hapi i parë që duhet të ndodhë, është që McGonigali shqiptar (Edi Rama) të largohet nga karrigia e pushtetit dhe ti hapë rrugë qeverisë teknike, që Shqipëria të ketë përfundimisht një qeveri përfaqësuese të shqiptarëve e jo të patronazhistëve dhe të krimit.
Discussion about this post