Deri në 2040, Durrësi do të ketë rritjen më të lartë në indeksin i madhësisë së valës së nxehtësisë midis një kampioni qytetesh të mëdha në rajon, raporton Banka Botërore. Shkak është betonizimi, mungesa e barit dhe e pemëve.
Ndërkohë, kryetarja e Bashkisë Durrës, Emirana Sako, vepron sikur nuk ka lidhje me këtë situatë. Ajo zëvendësoi në këtë post Vangjush Dakon, që është nën hetim nga Gjykata Antikorrupsion. Përveç të tjerave, Dako do të mbahet mend se ndërtoi një velierë gjigante prej betoni duke prishur edhe themelet e lashta të qytetit. Ai kishte në pronësi edhe një kompani që prodhon beton.
Sako vazhdon në të njëjtën rrugë dhe është bërë “mbretëresha e betonit”. Përveç lëshimit të lejeve të pallateve që po i marrin frymën qytetit, çdo fillim viti, Sako shpenzon miliona lekë për beton. Më pas gjithë vitin zhvillon tenderë të tjera për shtesa asfalti ku kontrakton kompanitë e miqve të saj. Avazi ka nisur edhe për vitin 2024.
Më datë 29 shkurt 2024, Ndërmarrja e Rrugëve Durrës, nën varësinë e bashkisë, ka hapur garën për tenderin me objekt ‘BLERJE ASFALTO-BETON, VITI 2024’. Për këtë bashkia ka planifikuar të shpenzojë 333 milionë lekë. Por ajo që na bënë ne përshtypje është se në tender nuk përcaktohet se në cilat rrugë do të përdoret ky asfalt, pasi vazhdimisht për rrugët hapen tendera të tjerë për asfaltim ose rikonstruktim dhe në fund ato mbeten sërish të amortizuara dhe me kanalizime skandaloze.
Kryetarja Sako nuk shqetësohet për këto “detaje”, por vetëm firmos që paratë të xhirohen tek kompania e paracaktuar.
Ndërkohë, tenderi ka risk korrupsioni, prandaj Open Data Albania i ka vendosur “Flamurin e kuq”.
Më konkretisht, kontrata është dhënë pa garë fare. Deri më datë 18 mars 2024, kur u bë mbyllja e tenderit ishin regjistruar 4 oferta. Madje firmat BIBA-X dhe BAMI HOLDING kanë paraqitur ofertat më të lira, me vlerë 200 milionë lekë dhe 260 milionë lekë. Shohim se këto dy oferta do t’i kursenin bashkisë 133 milionë lekë dhe 73 milionë lekë. Po pse kryetarja nuk i kursen ndonjë lekë arkës së bashkisë? Kuptohet se ku shkon diferenca.
Kështu, të dyja këto firma janë skualifikuar që në fazën e parë nga gara, së bashku me një firmë tjetër. Në fund mbeti vetëm zarfi me ofertën e firmës VARAKU E SHPK me vlerë 300 milionë lekë. Edhe pse ishte oferta më e shtrenjtë, edhe pse nuk kishte konkurrencë, Sako shpalli fituese kompaninë e Shpëtim Varakut.
Betoni e bën Durrësin qytetin më të nxehtë në Ballkan
Përveç të tjerave, kjo mania e Sakos për të blerë beton dhe asfalt e ka kthyer Durrësin në qytetin më të nxehtë në Ballkan, madje së fundmi është dhënë alarmi për atë çka na pret.
Sipas një raporti të fundit nga Banka Botërore për Ballkanin Perëndimor, valët e të nxehtit pritet të rriten shpejt në dekadat në vijim.
Në raport thuhet se “ndërmjet viteve 1990 dhe 2040, Durrësi do ketë rritjen më të lartë në indeksin i madhësisë së valës së nxehtësisë midis një kampioni qytetesh të mëdha në rajon. Pas Durrësit, me temperatura të larta do përballet edhe Prishtina, Podgorica, Sarajeva, Tirana dhe Shkupi”.
Raporti vë në dukje faktin se temperaturat në botë pritet të rriten me 4% në krahasim me verën mesatare, ndërkohë që temperatura në 6 vendet e Ballkanit Perëndimor parashikohet të rritet deri në 7,5°C krahasuar me nivelet para-industriale.
Matjet në qytetet shqiptare kanë treguar se në Tiranë, Shkodër dhe Vlorë, pabarazitë e temperaturës arrijnë në intervalin 4-6°C.
Një detaj i rëndësishëm i këtij raporti është fakti se stresi i nxehtësisë u tregua sistematikisht më i lartë në lagjet me densitet të lartë të sipërfaqeve të ndërtuara, si trotuaret e asfaltit dhe një incidencë e ulët e barit, shkurreve dhe mbulesave të pemëve.
Ndërsa prioriteti i kryetares Sako nuk është mirëqenia e qytetit, por të xhirojë paratë në arkën e miqve të saj biznesmenë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post