Princi Charles i Uellsit që tani do të jetë Mbreti Charles III i Mbretërisë së Bashkuar pas vdekjes së nënës së tij Mbretëreshës Elizabeth II ka vizituar Kosovën dy herë. Herën e parë në shtator 1999 dhe herën e dytë në mars 2016. Çifti i familjes mbretërore britanike Princi Charles dhe Dukesha Camila në vizitën e tyre para 6 vjetëve janë pritur me ceremoni të lartë shtetërore. Princi Charles tani mbret dhe Dukesha takuan udhëheqësit e tjerë politikë në Kosovë.
Ish-presidentja Atifete Jahjaga e kishte dekoruar Princin britanik Charles me “Urdhrin për Paqe, Demokraci dhe Humanizëm Dr. Ibrahim Rugova” për kontributin e tij jetësor në përkrahje të paqes, harmonisë dhe mirëkuptimit ndërmjet popullit të Kosovës dhe më gjerë.
Princi britanik ishte pritur nga një numër i madh i qytetarëve gjatë qëndrimit në qytetin e Prizrenit. Kurse, gjatë vizitës së parë të tij në shtator 1999, Princi Charles në uniformë ushtarake kishte vizituar trupat britanike të KFOR-it që menjëherë pas luftës numëronin rreth 10 mijë ushtarë të stacionuara në Kosovë.
Kryetari i AKR-së, Behgjet Pacolli, ka ngushëlluar familjen mbretërore për vdekjen e Mbretëreshës Elizabeth II dhe ka kujtuar kohën kur e kishte mirëpritur Princin Charles gjatë vizitës së tij të fundit në Kosovë.
“Ngushëllimet e mia edhe njëherë Mbretërisë së Bashkuar, familjes dhe gjithë vendeve të Commonwealth për ikjen nga kjo jetë e Mbretëreshës Elizabeth II. Mbretit të ri Charles i urojmë shëndet, jetë të gjatë dhe suksese në drejtimin e kësaj mbretërie. Mbreti Charles është ngushtë i lidhur me vendin tonë. Ai ka vizituar Kosovën dhe gjatë vizitës se tij të fundit ishte edhe mysafir në hotelin tonë”.
Vizitën e mbretit të ri të Mbretërisë së Bashkuar Charles III e ka rikujtuar edhe Drejtori i MCC-së në Kosovë, Petrit Selimi. Ai ka shpërndarë disa fotografi nga vizita e Princit britanik Charles më 2016 dhe shfaqjen e veprës artistike të artistit britanik Nathan Coley atëbotë në Prishtinë.
“Mbreti Charles III në Kosovë, duke parë ‘Një vend përtej besimit’”.
Mbretëresha Elizabeth II, monarkja më jetëgjatë në Mbretërinë e Bashkuar, vdiq të enjten në moshën 96-vjeçare. Familja e saj u mblodh në shtëpinë e saj në Balmoral të Skocisë, pasi iu përkeqësua gjendja shëndetësore.
Pallati mbretëror tha se “Mbretëresha vdiq paqësisht në Balmoral këtë pasdite”. Mbretëresha mori fronin në vitin 1952 dhe mbretëroi plot 70 vjet. Pas vdekjes së saj, fronin e merr djali i saj i madh, Charles, ish-Princ i Uellsit. Përmes një deklarate, ai tha se vdekja e nënës së tij është një moment i madh trishtimi për të dhe familjen. Mbreti i ri do të njihet zyrtarisht si Mbreti Charles III. Kryeministrja e re e Britanisë, Liz Truss, tha se kombi duhet të bashkohet për të mbështetur Mbretin. Ajo tha se vendi tani hyn në një epokë të re.
“Ne i ofrojmë atij besnikërinë dhe përkushtimin tonë”.
Discussion about this post