Fondi Shqiptar i Zhvillimit, me urdhër të kryeministrit Rama, ka vulosur fituesin që do të ndërtojë instilacionin e çuditshëm në godinën e Kryeministrisë. Kujtojmë se pasi e anuloi njëherë, për shkak të shkeljeve që u gjetën në atë tender, FSHZH e riktheu prokurimin me datë 23 Janar 2023. Atë ditë Gijotina.com ka denoncuar se si në faqen zyrtare të Agjencisë së Prokurorimit Publik është hequr statusi “i pezulluar” i procedurës “Instalacion me strukturë druri në oborrin e brendshëm të Kryeministrisë, “Parku Eden”, me fond limit 431.403.183 lekë të reja.
Një projekt i kotë, pasi do të ndërtohet vetëm një strukturë druri, e cila do t’u shërbejë vetëm punonjësve të këtij institucioni për t’u çlodhur.
Pas garës fiktive të hapur me datë 23 janar 2023, më 15 shkurt Agolli ka shpallur fituesin e këtij tenderi. Dhe fituese është shpallur firma shumë pranë qeverisë “Fusha” SHPK. Kompania në pronësi të Shkëlqim Fushës, i cili është denoncuar disa herë për abuzimet me tenderët dhe miliardat që i përvetëson nga bashkitë dhe ministritë përmes prokurimeve në kundërshtim me ligjin. Kështu, edhe këto 4 milionë euro, Rama ia ka besuar mikut të tij, Shkëlqim Fusha.
“Me anë të këtij njoftimi ju informojmë se, në këtë procedurë kanë marrë pjesë në fazën e dytë ‘ARKONSTUDIO’ me vlerë 431.400.000 lekë pa TVSH. Gjithashtu edhe firma ‘FUSHA’ me një vlerë të ofertës prej 398.478.729 lekë pa TVSH” thuhet në këtë dokument.
I gjithë procesi i këtij tenderi është korruptiv dhe në shkelje të hapur me ligjin. Por, shpallja e fituesit tregon edhe më shumë fakte se kemi të bëjmë me vjedhje dhe pastrim parash.
Pazaret e instilacionit
Historia e “Parkut Eden”, që do të ndërtohet për tekat e Ramës brenda godinës së Kryeministrisë ka nisur që në vitin që lamë pas. Dhe gjatë këtyre muajve është nxjerrë në pah vorbulla që fshihet në të vërtetë pas këtij projekti.
Kujtojmë se, në shtator të vitit 2022, arkitekti futurist austriak, Chris Precht, detyrohet të ndërpresë një intervistë me gazetën “Der Standart”, pasi, sipas tij, i duhej t’i përgjigjej një telefonate të kryeministrit shqiptar, Edi Rama.
“Rama kërkon një projekt për në Tiranë”, i tha Precht gazetares, pasi mbylli komunikimin me kryeministrin shqiptar. Ky detaj ishte tërësisht i panjohur për publikun shqiptar dhe, në kohën e bisedës, askush nuk e dinte për çfarë bëhej fjalë, përveçse dy personave që zhvilluan telefonatën-Rama dhe Chris Precht.
Dy vjet më pas, në Korrik të vitit 2022, Këshilli i Ministrave, me propozim të shefit të qeverisë, Edi Rama, ngarkon FSHZH që të ndërmarrë procedurat për ndërtimin e një instalacioni druri në oborrin e Kryeministrisë.
Kuptohet qartë se Fondi u ka shërbyer kryeministrave për të mbushur xhepin dhe nuk ka të bëjë fare me zhvillimin e vendit. Fondi Shqiptar i Zhvillimit, në 28 Gusht 2022, shpall procedurën për ndërtimin, e cila i ngjan më shumë një kulle druri, me vlerë mbi 3.7 milionë euro. Përse FSHZH dhe jo bashkia e Tiranës ose Drejtoria e Pritjes? Këtu duhet të ketë ndonjë hile, që duhet ta zhbulojmë më vonë.
Tenderi shkaktoi menjëherë reagimin e ashpër publik. Vendi, në atë kohë, si edhe sot, vuan një krizë të thellë ekonomike, me inflacion që ka “kapur qiellin”, me çmime shumë herë më të larta se një vit më parë dhe me një menaxhim skandaloz fondesh publike.
Në këto kushte, vendimi i Ramës për të shpenzuar gati 4 milionë euro për një projekt tërësisht të parëndësishëm për jetën e njerëzve, natyrisht që nuk do të mirëpritej nga opinion publik.
Rama, i vendosur nën presionin qytetar, u detyrua të bëjë një sqarim për projektin. Ai deklaroi se nuk bëhej fjalë për shpenzime luksi, por një projekt për energji të rinovueshme.
Në Tetor të vitit 2022, Fondi Shqiptar i Zhvillimit vendosi pezullimin e procedurës. Me shumë mundësi për të ulur tempin e revoltës dhe për ta rikthyer në një moment më të përshtatshëm.
Dhe, ky moment duket se është fillimi i këtij viti. Në 11 janar, Fondi Shqiptar i Zhvillimit e rikthen aktiv tenderin për ndërtimin e instalacionit prej druri, duke hapur rrugën për vjedhjen e 4 milionë eurove nga xhepat e qytetarëve shqiptarë.
Në përfundim të këtij përshkrimi të një abuzimi të hapur me pushtetin, për kërshërinë e lexuesve tanë shpjegojmë edhe nënkuptimin e projektit “Parku Eden”. Termi dhe ideja e projektit lidhen me historinë biblike, ku Edeni është kopshti i Zotit apo parajsa hyjnore në tokë.
Historia e Edenit i bën jehonë mitit mesopotamian të një mbreti, si një njeri primordial, i cili vendoset në një kopsht hyjnor për të ruajtur pemën e jetës. Bibla hebraike përshkruan Adamin dhe Evën duke ecur lakuriq rreth Kopshtit të Edenit për shkak të pamëkatësisë së tyre. A thua do ta “pastrojë” ky park shpirtin e kryeministrit tonë të korruptuar gjatë mbretëimit të tij?!
Esmeralda Hida
Lexo edhe“Mbledh kartat për PS”, kallëzohet penalisht drejtoresha e Kopshtit
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post