Kevi Muçllari, i riu i arrestuar pas një përplasjeje me një këshilltar bashkiak në Bashkinë e Pogradecit, është liruar nga gjykata e Korçës. Mësohet se Gjykata vendosi që të mos caktohet asnjë masë sigurie ndaj tij dhe e ka cilësuar arrestimin e tij si të paligjshëm.
Ngjarja e paprecedentë është regjistruar tre ditë më parë në mbledhjen e Këshillit Bashkiak të Pogradecit, pas miratimit të pikës 6 që lidhej me listën e tokës prej 34.660 ha në Çërravë për dhënie me qira, tensionet u rritën dukshëm. Vendimi u miratua me 20 vota pro, pas një debati të gjatë dhe të ashpër.
Pas njoftimit të rezultatit, situata u acarua dhe konflikti përfundoi në një përplasje fizike. Në këtë moment, këshilltari Ëngjëll Shyti u ngrit nga tavolina dhe u përplas fizikisht me banorin Kevi Muçllari, i cili ishte shprehur kundër vendimit.
Në një deklaratë për mediat, Muçllari tha se nuk është kriminel dhe se veprimet e tij ishin në mbrojtje të interesave të komunitetit.
“Unë u shpreha edhe në gjykatë, nuk jam kriminel. Isha aty në mbrojtje të interesit të komunitetit, në mbrojtje të një kauze që ne e kemi menduar dhe e mendojmë si të drejtë. Nuk ishte qëllimi im të dhunoja dikë për shkak të detyrës”, u shpreh ai.
Muçllari falënderoi edhe banorët që dolën në protestë gjatë ditëve të ndalimit të tij, duke theksuar se kauza e tyre nuk kishte për qëllim përfitime personale, por mbrojtjen e të drejtave të komunitetit.
“Falënderoj banorët që ishin pranë meje në këto ditë shumë të vështira. Ata dolën dhe protestuan sepse e kuptuan që po mbronim interesat tona me argumente dhe fakte”, tha Muçllari.
gijotina.com/
Discussion about this post