Forcohen masat e sigurisë për gjyqtaren Irena Gjoka, pas informacioneve për rrezik të mundshëm ndaj saj. Vendimi është marrë nga Komisioni për Mbrojtjen e Gjyqtarëve, ku përfshihen përfaqësues nga Ministria e Brendshme, Ministria e Drejtësisë, Këshilli i Lartë Gjyqësor, drejtuesi i Gjykatës së Posaçme Erjon Bani dhe struktura të Policisë së Shtetit.
Sipas vendimit, përveç gardës që siguron zakonisht gjyqtarët dhe prokurorët e SPAK, do të shtohen edhe efektivë nga njësia e mbrojtjes së veçantë. Detajet mbi kërcënimet dhe vlerësimin e rrezikut mbahen konfidenciale për arsye sigurie.
Gjyqtarja Gjoka ka qenë edhe më herët nën mbrojtje shtetërore, për shkak të funksionit të saj si zëvendëskryetare e Gjykatës së Posaçme dhe përfshirjes në çështje të rëndësishme, mes tyre edhe dosja “Partizani”. Në atë periudhë, për shkak të rrezikut të perceptuar, autoritetet i vendosën masa mbrojtëse me truproja.
Në listën e personave nën mbrojtje të shtuar nga shteti përfshihet edhe gjyqtarja Gentian Muça, ndaj së cilës u ndërmorën masa sigurie pasi rreth pesë vite më parë në automjetin e saj dhe të bashkëshortit, prokuror, u vendos lëndë plasëse.
Po ashtu, mbrojtje shtetërore vijon të ketë edhe ish-gjyqtari i Shkodrës, Tonin Stërkaj, në banesën e të cilit është vendosur tritol, ndërsa autorët nuk janë identifikuar. Ai ka larguar familjen jashtë vendit dhe, edhe pse është shkarkuar nga procesi i vettingut, autoritetet e konsiderojnë ende në rrezik.
Shumica e personave që gëzojnë mbrojtje të posaçme janë prokurorë të SPAK, si dhe disa prokurorë në rrethe, përfshirë edhe në Elbasan, ku njëri prej tyre është transferuar në Tiranë për arsye sigurie.
gijotina.com/
Discussion about this post