Prokuroria e Korçës ka përfunduar hetimet për ngjarjen e rëndë të ndodhur më 10 gusht në lagjen nr. 1 të qytetit të Pogradecit, ku humbi jetën 42-vjeçari Egli Proga.
Sipas burimeve pranë organit të akuzës, Denis Meçe do të përballet me akuzën penale të “vrasjes me dashje”, ndërkohë që tre persona të tjerë, Leonidha Guce, Voltan Shkulaku dhe Arjan Manellari, akuzohen për “veprime që pengojnë zbulimin e së vërtetës” dhe “moskallëzim krimi”.
Të njëjtat burime bëjnë me dije se rreth orës 14:00 të ditës së sotme, prokuroria pritet të komunikojë zyrtarisht akuzat ndaj të pandehurve në Institucionin e Ekzekutimit të Vendimeve Penale në Drenovë, ku ata ndodhen të paraburgosur.
Ndërkohë, hetimet nuk janë mbyllur plotësisht. Prokuroria ka veçuar një pjesë të çështjes për të vijuar hetimet në lidhje me dyshimet për shpërdorim detyre nga ana e disa punonjësve të policisë, për të cilët pritet të merren vendime në vijim.
Ngjarja tronditi opinionin publik në gusht të vitit të kaluar, ndërsa familjarët e viktimës kanë kërkuar në mënyrë të vazhdueshme zbardhjen e plotë të rrethanave dhe vënien para drejtësisë të të gjithë përgjegjësve.
Discussion about this post