Janë mbyllur ndeshjet e kthimit për raundin e 1/8-ave të Kupës së Shqipërisë, ndërsa numri i golave ishte goxha i lartë.
Përballja me numrin më të madh ajo midis Vllaznisë dhe Pogradecit. Shkodranët kanë shënuar plot 6 herë në portën e kundërshtarëve të tyre në vetëm 26 minuta lojë.
Ishte Mustedanagic ai që zhbllokoi rezultatin që në minutën e tretë, duke shënuar për ‘Kuqeblutë’, Aralica do të shënonte dy gola për Shkodrën në minutën e 7 dhe të 16-ë. Latifi realizoi nga pika e bardhë e penalltisë në minutën e 14, ndërsa Pura do të shtonte numrin e golave për Vllazninë me autogol.
Seria e golave për shkodranët e mbyll nga Hoxhaj në minutën e 26-ë, duke bërë që 45-minutshi i parë i kësaj sfide të mbyllej me rezultatin 6-0, teksa ekipi i Pogradecit nuk pati asnjë mundësi që të kundërpërgjigjej. Ndërsa pjesa e dytë e këtij takimi ishte më e qetë dhe nuk pati më gola të tjerë.
Sfidë tjetër interesantë ishte edhe ajo midis Skënderbeut dhe Bylisit, ajo u mbyll me rezultatin 2-2, golat për korçarët janë shënuar nga Meksi dhe Berisha në minutën e 23 dhe shtesën e pjesës së parë, teksa për Bylisin janë realizuar të dy nga Qardaku. Fitues i kësaj ndeshjeje dhe që kaloi në turin tjetër është Skënderbeu, që mundi të triumfonte vetëm pas penalltive.
Kastrioti-Flamurtari nga ana tjetër ishte një ndeshje surprizë, me vlonjtatë që tronditën ekipin krutanë me shifrat 2-4. Golat për vendasit i shënuan Karakaci dhe Mudrazija, ndërsa për Flamurtarin shënuan Diamant dopietë në minutën e 38 dhe në minutat shtesë, Pjeshka në minutën e 63 dhe Ribaj në minutën e 93-ë.
Kukësi-Egnatia e ka mbyllur këtë ndeshje me shifrat 1-0 dhe goli i vetëm është realizuar nga Taipi në minutat shtesë të pjesës së parë.
Habitës ka qenë pjesa e parë për Laçin që u duk se po kishte një ecuri shumë të mirë kohët e fundit. ‘Bardhezinjtë’ e kanë mbyllur këtë pjesë të parë të ndeshjes së kupës ndaj Tomorit në disfatë, teksa goli është realizuar nga Nako. Ndërsa do të duhej minuta e 73-ë e kësaj sfide që Laçi të barazonte rezultatin falë golit të Guindo dhe që ndeshja të mbyllej me shifrat 1-1.
Teuta fitoi 2-0 ndaj Korabit, ndërsa ka marrë avantazhin e pjesës së parë falë Ivanovic në minutën e 12, ndërsa në minutën e 88 Plaku arriti që të dyfishonte shifrat për ‘Djemtë e Detit’.
Partizani ka mundur të marrë një tjetër fitore në Kupën e Shqipërisë ndaj Besëlidhjes. Pjesa e parë mes tyre u mbyll me shifrat 0-0, ndërsa do të duhej minuta e 81-ë që Rrapaj t’i jepte avantazhin ekipit të tij, teksa 9 minuta më pas Junior dyfishoi shifrat për ‘Të Kuqtë’ e kryeqytetit./K.T/Gijotina.com
Discussion about this post