Mbyllet votimi për kryebashkiakun e ri të Kukësit

Procesi i votimit për kryetarin e Bashkisë së Kukësit ka përfunduar në 19:00.

Në krahasim me 14 Majin kur u mbajtën zgjedhjet vendore, sot pjesëmarrja ishte më e ulët.

Sipas të dhënave paraprake, kutive të votimit i janë drejtuar 19, 739 qytetarë (44,26%), ku kandidatë për Bashkinë Kukës janë Emri Vata nga koalicioni “Bashkë Fitojmë” dhe Albert Halilaj nga Partia Socialiste.

Kanë qenë 4 mijë votues më pak se më 14 Maj. Procesi i votimit ishte përgjithësisht i qetë. Përfaqësues të koalicionit opozitar ‘Bashkë Fitojmë’ kanë denoncuar prezencën në disa qendra të votimit të përfaqësuesve të PS që mbanin shënim zgjedhësit që shkonin për të votuar.

Pas mbylljes së votimit, ka nsiur procesi i grumbullimit të kutive në një qendër të vetme për të nisur më pas me numërimin e votave.

Zgjedhjet në Bashkinë e Kukësit vijnë pas largimit të Safet Gjicit nga posti i kryebashkiakut, pas publikimit të video-skandalit duke kryer marrëdhënie seksuale në zyrë me Alma Kaçin. Aktualisht, Gjici ndodhet në burg, nën masën e sigurisë arrest me burg për akuzën e korrupsionit pasiv. Në videoskandal, pas konsumimit të marrëdhënies intime me Alma Kaçin (po ashtu e arrestuar për korrupsion aktiv), shihet se Gjici i premton asaj një tender për sterilizimin e qënëve të rrugës.