“Të mos kontestohet rezultati”, ky është reagimi i parë pas mbylljes së procesit të votimit në 6 bashkitë e vendit, nga selia e Partisë Socialiste, që erdhi nga Sekretari i Përgjithshëm, Damian Gjiknuri. Ai theksoi se është i pakënaqur me numrin e pjesëmarrjes së votuesve!
“PS është e kënaqur nga ecuria e këtij procesi, prisnim një pjesëmarrje më të lartë, po i kuptojmë se s’ishte motivimi si në zgjedhjet e përgjithshme apo kushtet atmosferike, askush nuk u pengua në ushtrimin e të drejtës së votës”, deklaroi Gjiknuri.
I pyetur për pretendimet e Partisë Demokratike për parregullsi në Vorë gjatë procesit të votimit, Gjiknuri tha se kjo është thjeshtë një tymnajë e brendshme politike, pasi gjithçka sipas tij, ka shkuar sipas ligjit. Madje, ai u shpreh se nga ky proces në Vorë është nxjerrë edhe një mësim që me Reformën zgjedhore t’i mëshohet edhe më shumë depolitizimit të komisionerëve.
“Dua të bëj thirrje komisionerëve gjithçka duhet dhe do të shkojë sipas ligjit, të ushtrojnë detyrën deri në fund të mos intimidohen nga partitë politike dhe as të ndjekin udhëzimet e partive politike, shpresojmë të kemi rezultatet e Vorës”, tha Gjiknuri.
Duke shprehur sigurinë në fitore në 6 bashki, Gjiknuri sqaroi se PS do të pranojë çdo lloj rezultati, madje pati edhe një mesazh për të gjitha partitë e tjera të veprojnë njësoj. Sipas tij, nuk ka vend për kontestime sepse ky proces ka qenë i monitoruar nga ambasadorët, e huaj në vendin tonë, përfshirë edhe SHBA-BE.
“Votimi ka qenë elektronik, komisonerët kanë një rol minimal, janë pretendime të kota më vjen keq që PD është katandisur deri këtu sa nuk gjen komisionerë, janë tymnaja të brendshme, në reformën zgjedhore duhet t’iu mëshojmë depolitizimit të komisionerëve. Ne i kemi pranuar zgjedhjet, nuk themi na vodhën zgjedhjet, do pranojmë rezultatin dhe të gjitha duhet ta pranojnë rezultatin. Ka pasur ambasadorë, ka pasur shumë sy, nuk besoj se ka asnjë kontestim”, këmbënguli Gjiknuri
Së fundmi, Gjiknuri ka bërë me dije se nëse do të humbasin, PS nuk do të kontestojë rezultatin.
Discussion about this post