Mbyllja e hetimeve të SPAK, Kryemadhi: Kam bashkëpunuar me Metën për heqjen e mitrës

SPAK ka përfunduar hetimet për aferën CEZ-DIA, që përfshin ish-presidentin Ilir Meta dhe Monika Kryemadhi.

Ish-kryetarja e LSI-së, në dalje të SPAK zhvilloi një komunikim me mediat ku deklaroi se brenda ambienteve të SPAK iu komunikuan të njëjtat akuza për veprat penale të korrupsionit, pastrimit të parave, si dhe mosdeklarimit dhe fshehjes së pasurisë.

“Përfundimet e hetimit po vonohen sepse është çështje voluminoze. Ishin gjithë këto faqe që ishin për t’u firmosur, besoj që shumë shpejt vazhdojnë akoma. Janë në proces hetimi, do kemi edhe një thirrje tjetër. Meqë erdha sot nuk do vij të hënën e parë të qershorit për t’u paraqitur.  Mund të shihemi në korrik por për gjëra të tjera.

Për një gjë më vjen keq, që kur nis gjyqi do ta bëjmë të hapur. Sa i përket çështjes se me kë kam bashkëpunuar, sipas SPAK kam bashkëpunuar me Ilir Metën për heqjen e mitrës. Janë komunikuar të njëjtat akuza, pa asnjë shtesë”, tha Kryemadhi.

Hetimet janë fokusuar në tre çështje kryesore: aferën CEZ-DIA, lobimin e ish-LSI-së në Shtetet e Bashkuara të Amerikës, si dhe hetimin pasuror ndaj ish-çiftit Meta-Kryemadhi.