Pak ditë më parë kujdestaret e Shtëpisë së Fëmijës në Vlorë denoncuan se Ministria e Shëndetësisë iu ka kërkuar që deri në fund të dhjetorit të kthejnë në shtëpitë e tyre fëmijët që marrin kujdes nga kjo qendër, ose t’i japin sa më parë për birësim. Kujdestaret dhe psikologet e kësaj qendre thanë se kjo kërkesë është e pamundur të realizohet dhe rrezikon që shumë fëmijë të mbeten në rrugë.
Në kuadër të ankesës së tyre ka reaguar Kontrolli i Lartë i Shtetit, i cili përmes një njoftimit të publikuar së fundmi tregon se do të nisë hetimet rreth kësaj çështje. Sipas njoftimit, KLSH do të nisë auditim në Ministrinë e Shëndetësisë dhe Drejtorinë e Përgjithshme të Shërbimit Social, ku do të kalojë në skaner e gjithë procedura e ndjekur në zbatim të projektit “Për deinstitucionalizimin e institucioneve 2020-2021”.
Mësohet se KLSH do të verifikojë formën dhe mënyrën e zhvillimit të projektit ku e ardhmja e fëmijëve jetim është në fokusin kryesor të këtij kontrolli, për të garantuar jetesën e tyre. Sakaq, bëhet me dije se do të evidentohen edhe procedurat e përshpejtuara për birësim që ka ndjekur institucioni. Madje do të analizohet me detaje nëse këta fëmijë kanë kushte të përshtatshme për t’u kthye në familjet e tyre.
Kujtojmë se nga ankesa e sa kujdestarëve, Fëmijët e jetimoreve deri në dhjetor do detyrohen të kthehen në shtëpitë biologjike ose do të birësohen me procedurë më të shkurtuar se më parë. Ato kanë treguar se, ky planë ka nisur në shtator të vitit 2019, por fillimisht iu është paraqitur thjesht si projekt provë që nuk do të kishte asnjë ndikim te fëmijët, më pas është paraqitur me VKM ku me ultimatum është kërkuar largimi i tyre nga jetimoret.
Por, kujdestaret këmbëngulin se ky plan do të dëmtojë shumë fëmijët, pasi disa prej tyre vijnë nga familje me probleme të theksuar ekonomike dhe një pjesë e mirë nga familje ku ushtrohet dhunë. Por, qeveria nuk e ka dëgjuar këtë kërkesë të tyre dhe vazhdon të justifikohet se ky plan është marr shembull një projekt holandez.
Discussion about this post