Gjykata administrative ka shtyrë seancën për shqyrtimin e kërkesë padisë të prindërve të kopshtit “Zubeyde Hanim”, pjesë e kolegjit “Turgut Ozal”.
Avokati i 50 prindërve Franc Terihani kërkoi përjashtimin e gjyqtares Afërdita Maho me pretendimin se ajo është shprehur njëherë për kërkesën e padisë së “Turgut Ozal”. Të njëjtën kërkesë depozitoi edhe avokati i “Turgut Ozal”, Isuf Shehu, i cili është palë e tretë në këtë proces.
Gjatë ditës së sotme, avokati i kompanisë tha për mediat se kanë kërkuar ndryshimin e gjyqtares që më parë kishte dhënë vendim kundër padisë së kompanisë për anulimin e vendimit.
“Ne kërkuam ndryshimin e gjyqtares, pasi më herët e njëjta gjyqtare ka dhënë vendim kundër padisë së shkollës, ajo e ka dhënë vendimin e saj kështu që nuk mund të presim që të vendosë ndryshe për padinë e prindërve. Çudia është se edhe vetë gjyqtarja ka kërkuar heqjen dorë nga gjykimi, por kërkesa e saj nuk është miratuar”, tha ai.
“Fëmijët të vendosen aty ku kanë qenë dhe të mos i shkaktojmë më trauma të tjera. Ne jemi përpjekur ti mbrojmë nga dëmi i mundshëm psikologji, por ata nuk e kuptojnë dot përse është mbyllur dhe kemi të njëjtin refren të përditshëm, ‘përse nuk na çon në kopsht’?”, tha ndërkohë njëri nga prindërit.
Shqyrtimi i kësaj kërkesë do bëhet nga një trupë tjetër gjyqësore më datë 9 nëntor në orën 13:30.
Discussion about this post