Përfaqësuesit e “Turgut Ozal Education” kanë dalë në një deklaratë për mediat duke komentuar vendimin e qeverisë për mbylljen e shkollës “Mehmet Akif Ersoy”.
Ata kërkojnë nga ministria e Arsimit të rishikojë vendimin, që sipas tyre prish qetësinë e mbi 200 familjeve që i kanë besuar këtij institucioni arsimin e fëmijëve të tyre. Gjithashtu theksuan se do ta ndjekin çështjen në gjykatën përkatëse.
“Ministria e Arsimit miratoi ndryshimin e vendndodhjes. Duhet theksuar se gjatë gjithë këtyre viteve, kopshti ka qenë objekt i inspektimeve të vazhdueshme. E vërteta është se ndodhemi përpara një fakti të tillë të vështirë për ta kuptuar. Rrethanat na bëjnë të kuptojmë se jemi sjellë në një situatë të tillë si pasojë e rrethanave jo arsimore. Ne kërkojmë nga ministria e Arsimit të rishikojë vendimin pasi ka përballë persona që e dashurojnë arsimin. Ky vendim prish qetësinë e mbi 200 familjeve që i kanë besuar këtij institucioni arsimin e fëmijëve të tyre. Vlerat dhe trysnia e jashtme nuk kanë të bëjnë me kushtet në të cilët zhvillohet arsimi. Kemi informuar edhe institucionet e huaja për situatën e krijuar. Shprehim gatishmërinë tonë për të ndjekur rrugën ligjore në gjykatën përkatëse. Sjellim në vëmendjen tuaj se stafi pedagogjik janë të vendosur për t’u trashëguar brezave një të ardhme ku mbizotëron dashuria për atdheun”, thanë përfaqësuesit në konferencën për shtyp.
Katër ditë më parë kopshti jopublik “Zübeyde Hanım”, i cili është pjesë e shkollave Turgut Ozal me anë të një njoftimi shpërndarë prindërve njoftonte se me kërkesë të Ministrisë së Arsimit ky kopsht do të mbyllej. Ndërkohë me anë të një VKM-je është vendosur dhe mbyllja e Institucionit Arsimot “Mehmet Akif Ersoy”. Ky vendim i Ramës vjen si pasojë e kërkesës së presidentit turk që i ka kërkuar vazhdimisht të dëbojë nga vendi gylenistët.
Discussion about this post