Një tjetër tragjedi e rëndë ka goditur ujërat territoriale greke në Detin Egje, ku një varkë që transportonte refugjatë dhe emigrantë nga bregu turk drejt ishullit Lesbos është përmbysur mëngjesin e sotëm, duke lënë pas katër viktima, mes tyre dy gra, një burrë dhe një fëmijë të mitur.
Sipas raportimeve nga mediat greke, 34 persona arritën të mbijetojnë dhe u nxorën në breg nga Roja Bregdetare greke, e cila më pas i transportoi në qendrën e mbyllur të pritjes në Kara Tepe, në zonën e Mytilenes.
Ngjarja ndodhi në zonën Tsilia të Gera, në Lesbosin jugor, në një kohë kur kushtet detare ishin të vështira, me erëra deri në 7 ballë dhe valë mbi një metër e gjysmë të larta, që besohet se kanë ndikuar në përmbysjen fatale të mjetit lundrues, teksa goditi bregun shkëmbor.
Sipas të dhënave të para, të gjithë personat në bord ishin me origjinë afrikane, ndërsa nuk dihet ende saktësisht se sa persona ndodheshin në varkë në momentin e mbytjes.
Roja Bregdetare greke po vijon kërkimet në zonë për të siguruar se nuk ka të zhdukur të tjerë në det.
Kjo ngjarje rikthen në vëmendje rrezikun e madh që mijëra refugjatë dhe emigrantë përballojnë çdo ditë në përpjekje për të kaluar në Evropë përmes rrugëve detare të rrezikshme, shpeshherë në mjete të mbingarkuara dhe në kushte ekstreme atmosferike.
Discussion about this post