“Kryeministrin Edi Rama po e mbron vetëm imuniteti diplomatik prej kryeministri.” Kështu është shprehur deputeti demokrat Edmond Spaho në “Debat” në “A2 News”, ndërsa argumentonte sjelljen e opozitës së fundmi pas bërjes publike të çështjes McGonigal.
Spaho po ashtu paralajmëroi se shumë shpjet do të dalin në dritë fakte rreth çështjes së non gratave siç u shpreh ai.
“Ramën po e mbron vetëm imuniteti prej kryeministri sepse ka rrënuar sigurinë e SHBA-ve dhe i ka ekspozuar jashtëzakonisht keq në sytë e opinionit botëror. Këtu do të jemi dhe do të shini çfarë faktesh do të dalin për çështjen e non gratave me biznesmenët. Në Tiranë flitet, shumë bile. Edhe njerëzit vetë që janë prekur dhe janë takuar flasin tashmë. Për paratë që kanë kaluar për t’i shpallur. S’më takon mua t’i them këto emra….Të dalin dhe të flasin sa kanë paguar, ose sa kanë kërkuar dhe u janë refuzuar”, tha ai.
Sipas deputetit demokrat, ka figura publike që kanë paguar në mënyrë që të mos përfshihen në këtë liste të zezë të SHBA-së, të gjendur përballë shantazhimit.
“Mekanizmin e non gratës, e kanë diskredituar për përfitime…Ata që kanë paguar deri më sot kanë shpëtuar. Mos harroni që në 2018 Edi Rama është shprehur në Kuvend se do të bëhet publike një listë me 150 vetë që do të shpallen non gratas”, shtoi Spaho.
Ndërkohë, kujtojmë se një ditë më parë Kuvendi përjashtoi Spahon edhe 5 deputetë të tjerë të Partisë Demokratike. Me votat e Socialistëve, Sekretariati për Procedurat dhe Votimet vendosi qe Deputetja Lindita Metalia të përjashtohet për 5 ditë, Greta Bardeli 3 ditë, ndërsa me nga 10 ditë u përjashtuar Edmond Spaho, Oerd Bylykbashi, Elda Hoti dhe Sorina Koti.
Spaho ka deklaruar se do t’i drejtohet gjykatës për këtë masë të përsëritur ndaj tij, ndërsa nesër ka një tjetër seancë parlamentare ku Kryeministri nuk do të jetë, pasi ndodhet për vizitë në Japoni dhe opozita pritet të protestojë brenda dhe jashtë Kuvendit.
Discussion about this post