Ish-kryeministri Sali Berisha sapo ka mbyllur protestën e thirrur sot para kryeministrisë, ku edhe pse kishte një prezencë të vakët, ai ka bërë deklarata të forta, duke e quajtur si protestën më të fuqishme në histori. Gjatë fjalës së tij në podium, Berisha ka folur si të ishte kryeopozitar, madje ka thënë se mbështetësit e tij janë opozita që do të rrëzojë qeverinë. Duke pretenduar se do të marrë drejtimin e PD dhe më pas atë të vendit, Berisha tha se kur të vijë në pushtet do të rrëzojë ‘Open Balkan’.
“Ne ngrihemi fuqishëm në mbrojtje të interesave jetike të kombit shqiptar, të shoqërisë shqiptare, ne jemi mbledhur sot këtu për të protestuar kundër projektit fantazëm të aleancës trilaterlae Beograd- Tiranë-Shkup. Kjo nuk është një protestë kundër bashkëpunimit rajonal, ne jemi, kemi qenë dhe mbetemi të angazhuar për integrime rajonale, por kjo është një protestë kundër një projekti i cili është refuzuar në mënyrë kategorike nga Bosnja Hercegovina, Mali i Zi dhe Kosova, është shpallur si kërcënim, nuk synon gjë tjetër veçse vendosjen e hegjemonisë serbe në këtë rajon.
Miqtë e mi sot ne protestojmë si shqiptarë në këtë shesh sepse mini-Ballkani i hapur është projekti djallëzor me të cilin kërkohet ndarja e Kosovës, një përpjekje aventurierësh”, deklaroi ai.
Sakaq, në përfundim, në një prononcim për mediet ai po ‘mburrej’ me pjesëmarrjen e militantëve në këtë protestë, duke thënë kjo është opozita më e fortë në 30 vite.
“Do jetë opozita më e fortë që ka parë vendi pas 1991. sot ka një shumicë dërrmuese, pakicë në anën tjetër, nëse kjo pakicë vazhdon të mos njohë shumicën. Mendon se na shtyp me ndihmën e qeverisë, do mbahet përgjegjëse në mënyrë shembullore. Ajo dhe Edi Rama. Shumicën e respekton nuk e mban dot kurrë peng”, tha Berisha
I pyetur se si do të vijojë lëvizja e tij, Berisha tha se përgjegjësi ka dhe opozita për situatën në vend që nuk i priu për të ngjallur shpresën dhe besimin tek qytetarët shqiptarë dhe se kjo kohë merr fund.
Discussion about this post