Klaudio Malaj 31- vjeç shoferi i kreut të Inspektoriatit të Mbrojtjes së Territorit në Bashkinë e Tiranës, Mariglen Qato, është lënë sot në burg nga Gjykata e Tiranës.
Gjykata ka caktuar masën e arrestit me burg për veprat penale ‘prodhim dhe shitje narkotikësh’ dhe ‘armëmbajtje pa leje’.
31-vjeçari u arrestua nga Policia e Tiranës mbrëmjen e 18 shtatorit, pasi në mjetin e tij luksoz ‘Audi’ A6 u gjet dhe sekuestrua një sasi kokaine, e ndarë në 34 doza të gatshme për t’i shitur. Fillimisht ai ka tentuar t’i shmanget kontrollit të forcave Shqiponja. Por, pas insistimit të uniformave blu, ai pranoi se në makinë kishte vetëm doza droge për përdorim vetjak, por më pas rezultoi se kishte një sasi të konsiderueshme.
Pas arrestimit të tij, policia ushtroi kontroll në banesën e të dyshuarit dhe gjeti 3 pistoleta dhe një sasi të konsiderueshme fishekësh. Policia në njoftimin e saj nuk bën të ditur se Malaj është shoferi i kreut të Inspektoritit të Mbrojtjes së Territorit në Bashkinë e Tiranës, Mariglen Qato duke e përcjellë lajmin si një njoftim rutinë të saj.
Discussion about this post