Policia Rrugore ka vijuar kontrollet për parandalimin e aksidenteve. Gjatë 24 orëve të fundit disa drejtues mjetesh janë konstatuar për tejkalim shpejtësie më shumë se dyfishi i normës së lejuar.
Në rrugën e Kombit është ndaluar nga policia një qytetar nga Kosova me inicialet E.B., pasi u kap duke lëvizur me mjetin “Jaguar” me shpejtësi 191 km/orë, i cili u ndëshkua me 40.000 lekë të rinj.
Përgjatë 24 orëve të fundit janë arrestuar në flagrancë 14 drejtues mjetesh dhe motora, nga të cilët 7 për drejtim mjeti pa leje drejtimi dhe 7 për drejtim mjeti në gjendje të dehur.
Gjithashtu janë pezulluar 56 leje drejtimi, nga të cilat 36 për shpejtësi mbi normat e lejuara dhe 20 për drejtim mjeti nën efektin e alkoolit apo në gjendje të dehur.
Po ashtu të gjithë vendin janë ndëshkuar me masë administrative 2019 drejtues mjetesh, për shkelje që sjellin pasoja në jetën dhe shëndetin e përdoruesve të rrugës.
