Mandati i presidentit aktual mbaron në datën 24 korrik, teksa mazhoranca është fokusuar në përzgjedhjen e kandidatit që për të duhet të përfaqësojë krejt të kundërtën e Ilir Metës, një figurë mbi palët politike. Së fundmi në rrjete sociale gjithmonë e më shumë po lakohet ideja e një presidente grua, ku një ndër emrat më të përmendur është edhe emri i historianes, Elena Kocaqi.
Ditën e sotme, e ftuar në një intervistë për “Studio Live” me gazetarin Arbër Hitaj, historiania Kocaqi ka renditur tre arsye se përse ajo është një kandidate e vlefshme dhe e mundshme për t’u zgjedhur presidentja e Shqipërisë për 5 vitet e ardhshme.
Arsimi, pastërtia e figurës dhe qëndrimi i saj bipartiak janë pikat e saj të forta, për të cilat Kocaqi shprehet se ka fituar edhe pëlqimin e pjesës më të madhe të popullit në rrjetet sociale dhe se duhet të merren parasysh nga mazhoranca për zgjedhjet.
“Duke njohur historinë e shteti tim si historiane, arsim më bën profesionale në këtë fushë, pastërtia e figurës time gjithashtu ka vlerë pasi nuk kam qenë kurrë e angazhuar politikisht dhe kam mbajtur gjithmonë një qëndrim bipartiak dhe kam dashur gjithmonë të ruaj interesat e shqiptarëve. Këto janë kritere kryesore që duhen për president dhe nuk kam shkelur kurrë ligjin gjatë jetës time. Unë kam kontaktet e mia dhe mazhoranca e ka parë opinionin publik në rrjet dhe në media emrin tim dhe mazhoraca do e marrë në konsideratë në të mirë të popullit dhe në të mirë të saj”.
Nga ana tjetër, lidhur me faktin se si duhet të jetë figura e presidentit të vendit, Kocaqi është shprehur se ajo vetë do të ishte një figurë mbi palët politike dhe unifikuese duke pasur në vëmendje vetëm interesin e shqiptarëve.
“Unë nuk hyj ne punët e brendshme të partive dhe nuk jam pjesë e tyre dhe po të zgjidhem jam për zgjidhjen e problemeve dhe për t’i shërbyer qytetarëve. Presidenti duhet të jetë apolitikë, pasi një president politik krijon konflikte cilido qoftë ai, një president që nuk vjen nga asnjë parti shikon interesin e shtetit dhe jo interesat partiake. Është në të mirën e Shqipërisë që të kemi një president mbi palët. Prandaj presidentit priren të jenë jurist pasi njihni mirë ligjin dhe shtetin. Unë do të isha një kandidate konsensual pasi nuk kam probleme me mazhorancën apo opozitën dhe respektoj të gjitha palët dhe nesër nuk do të prek interesin e asnjë pale por do i respektojë ato në maksimum”.
Së fundmi, Partia Socialiste nis ditën e nesërme procesin e konsultimeve për emrin e presidentit të ri dhe do të përfundojë më 29 prill dhe më pas të fillojë procesi në Kuvendi, me raundin e parë të votimeve më 4 maj. Sipas Kushtetutës procesi i zgjedhjes së Presidentit të Republikës në Kuvend nis jo më vonë se 60 ditë para mbarimit të mandatit të Presidentit aktual. Domethënë në rastin konkret procedura duhet të nisë para datës 24 maj.
Kujtojmë se, Presidenti Ilir Meta mbyll mandatin e tij më 24 korrik të këtij viti.
Discussion about this post