Me hanxhar dhe 1 mijë fishek, polici shqiptar kapet “mat” në kufi

Në orët e vona të mbrëmjes së djeshme në pikëkalimin kufitar të Vermicës janë kapur mbi 1,000 copë fishekë të gjuetisë.

Lidhur me ngjarjen, inspektorati policor ka njoftuar se automjeti ishte duke u drejtuar nga një zyrtar policor jashtë detyrës zyrtare.

“Një automjet me targa kosovare dhe i drejtuar nga shtetas i Republikës së Kosovës rreth orës 01:05 ka tentuar që të shmang kontrollet doganore (duke tentuar të ik), mirëpo është urdhëruar që të ndalohet për kontroll doganor. Drejtuesi i mjetit deklaron se nuk posedon asgjë. Mirëpo në bazë të dyshimit të arsyeshëm urdhërohet që mjetin ta drejtoje në vijën e dytë të kontrollit, pas kontrollimit të detajuar së bashku me zyrtarët policor në pjesën e gomës rezervë të kamufluara janë gjetur municion gjuetie. Automjeti është dërguar për skanim në doganën e Shqipërisë, mirëpo pas kontrollimit nuk është gjetur mall tjetër. Sasia e gjetur si në vijim: Municion gjuetie 1074 copë dhe thikë gjuetie pa markë”, thuhet në njoftimin e tyre.

Ndaj të dyshimtit është iniciuar rasti për kontrabandim të municionit. Municioni i gjuetisë është konfiskuar dhe rasti është dorëzuar te Policia e Kosovës.