Ish-kryetari i LDK në Kosovë, njëkohësisht ish-kryeministër, ka deklaruar se ka patur tentativë për një atentat edhe ndaj tij.
Ai u rrëfye pasi dolën në pah dosjet sekrete të Policisë së Shtetit, të cilat zbuluan planin për vrasjen e kryeministrit aktual Albin Kurti, ish-kryetarit të Partisë Demokratike Lulzim Basha dhe disa të tjerëve.
Mustafa tregoi disa raste kur edhe ai vetë ishte sulmuar me bomba molotovi dhe me gurë nga përkrahësit e lëvizjes- partisë Vetëvendosja.
“Ka pasur edhe veprime për atentat siç është gjuajtja e shtëpisë time me bomba molotov nga VV, tentimi të gjuhet makina ime zyrtare nga militantët e VV-së me iriq të hekurt, gjuajtja me gurë e makinës time, por duke e qëlluar makinën e përcjelljes policore në një natë në kthim nga Suhareka. Të gjitha këto i dinë organet e drejtësisë,”- tha Mustafa.
Kujtojmë se dokumente sekretë nga Policia e Shtetit kanë ‘rrjedhur’ pas sulmit të kryer nga hakerat dhe kanë zbuluar disa atentate të planifikuara ndaj zyrtarë shqiptarë e të Kosovës.
Dokumentet kanë zbuluar se është tentuar vrasja e disa personave, mes tyre ish-kryedemokrati Lulzim Basha dhe kryeministri i Kosovës, Albin Kurti. Veç tyre ishte tentuar eliminimi i Ismet Haxhës dhe Xhavit Halitit, dy zyrtarë në Kosovë. Po ashtu janë siguruar informacione edhe për qarkullimin lirshëm të Talo Çelës në Tiranë.
Ai ka ardhur dhe ka takuar Ervin Matën, një prej protagonistëve të vrasjes në ish-Bllok, ku mbeti i plagosur Ervis Martinaj dhe u vra miku i këtij të fundit, Fabjan Gaxha.
Discussion about this post