Deputeti i PD, Oerd Bylykbashi ka zbuluar sot atë që e quan “tregti kuajsh” ose “Pazar” që kryeministri Edi Rama po i ofron PD. Sipas Bylykbashit, interesi kryesor i opozitës është reforma Zgjedhore, pas asaj që miratoi qeveria pa afirmimin e opozitës më 30 korrik, ndërsa përmend dhe reformën Territoriale të vitit 2014, të cilën opozita e ka konsideruar më herët si dështim.
“Reforma më kryesore për opozitën duhet të jetë ndryshimi i Kushtetutës për të vendosur një sistem të ri zgjedhor, sepse ky sistem që miratoi Rama pa konsensusin e opozitës më 30 korrik 2020 është i padrejtë, shkel parimet kushtetuese dhe është toksik për demokracinë. Bashkë me të, duhet rishikuar ndarja territoriale e bashkive. Demokracia lokale po asfiksohet nga reforma e dështuar e 2014, e bërë keq me qëllim për të fituar zgjedhjet ne tavolinë. Pjesëmarrja në zgjedhjet bashkiake të 2019 ku opozita mund të fitonte gjysmën e bashkive, do të rekuperonte mos pjesëmarrjen e opozitës në reformën territoriale. Por ky shans u humb kur u vendos të mos hyjë në zgjedhje”, tha Bylykbashi.
Ai flet edhe për një reformë për zgjedhjet e 25 prillit, që opozita i ka konsideruar më herët si “masakër elektorale”. Për reformën në Drejtësi ai shprehet se duhen ndrequr dështimet që qytetarët të mos vuajnë pasojat e Vetting-ut.
“Gjithashtu duhet bërë reformë për të bllokuar, ndalur dhe ndëshkuar ndërhyrjen e shtetit në zgjedhje siç ndodhi më 25 prill 2021. Ky është rreziku më i madh që kanë zgjedhjet, shumë më i madh se bandat, sepse ndërhyrja e një shteti të politizuar në zgjedhje është sistematike, masive dhe kapilare. Më pas mund të ndreqim dështimet e “suksesshme” të reformës në drejtësi. Sigurisht, dështimet nuk mund të lihen pa ndrequr sepse vuajnë shqiptarët që nuk po marrin më asnjë lloj drejtësie. Por vota e lirë dhe e drejtë qëndron më lartë se Vettingu sepse aty qëndron sovraniteti i popullit”, shprehet ai.
Deputeti demokrat shkruan ndër të tjera, se 94 votat për ndryshimin e Kushtetutës janë e vetmja garanci për opozitën, dhe votat mund të jepen vetëm nëse sigurohen reformat e mësipërme që garantojnë votën e shqiptarëve.
Kujtojmë se, Bylykbashi është një ndër deputetët që ka zgjedhur të qëndrojë në krah të ish- kryeministrit Berisha në betejën me Lulzim Bashën, ku ky i fundit për të “marrë hak”, e përjashtoi nga drejtimi i Reformës Territoriale.
