Me Ju, ne jemi 12! Shiten të gjitha biletat e ndeshjes Shqipëri-Poloni

Shqipëria do të zhvillojë dy ndeshje shumë të rëndësishme në muajin shtator, me Republikën Çeke dhe me Poloninë.

Fillimisht me 7 shtator kuqezinjtë do të udhëtojnë në Çeki, derisa tre ditë më vonë presin Poloninë në Tiranë.

Duke marrë parasysh se të dyja sfidat janë tejet të rëndësishme për kualifikimin në Euro 2024, janë shitur tanimë të gjitha biletat për ndeshjen e 10 shtatorit në ‘Air Albania’ Shqipëri – Poloni.

Ka qenë Federata e Futbollit të Shqipërisë që ka njoftuar se nuk ka më asnjë biletë në dispozicion për duelin e së dielës mbrëma.

Njoftimi

Të gjitha biletat e vlefshme për ndeshjen Shqipëri – Poloni, e vlefshme për kualifikueset e Kampionatit Europian ‘Gjermani 2024’ janë shitur.

Federata Shqiptare e Futbollit dëshiron të falënderojë të gjithë tifozët shqiptarë që kanë vendosur të jenë të pranishëm në stadiumin ‘Air Albania’ më 10 shtator, në mbështetje të ekipit tonë kombëtar dhe i fton të krijojnë një atmosferë të ngrohtë, pozitive dhe të tregojnë respekt ndaj ekipit kundërshtar.

Njëkohësisht, Federata e Futbollit i bën thirrje edhe tifozëve kuqezi, të cilët nuk kanë mundur të pajisen me bileta për këtë ndeshje kaq të rëndësishme për të gjithë, të vazhdojnë ta përkrahin Kombëtaren e zemrës së tyre.

Të mbështesim kuqezinjtë tanë të gjithë se bashku! ME JU, NE JEMI 12!