Dy të rinj, 27 dhe 28 vjeç, që udhëtonin nga Korça drejt Tiranës, u arrestuan nga policia e kryeqytetit, pasi po transportonin një armë kallashnikov. Të arrestuarit janë Florjan Kollonata, 27 vjeç, nga Korça dhe Xhentino Pllana, 28 vjeç, nga Pogradeci, të dy banues në Tiranë.
Kapja e tyre është bërë pas informacioneve që policia mundi të sigurojë përmes rrugëve informative, ndërsa arma ishte mbështjellë me batanije dhe ishte futur në një çantë të madhe.
Dy të rinjve iu gjet me vete edhe një thikë buke, ndërsa iu sekuestruan edhe 3 aparate celularë.
Nga Korça dy shokët erdhën me autobus të linjës. Akoma nuk dihet arsyeja e sjelljes së armës në Tiranë, ndërsa kanë nisur hetimet për të zbardhur të plotë ngjarjen.
Arma do të dërgohet në laborator për ekspertizë, për të parë nëse është përdorur në krime të tjera.
Discussion about this post