Në një operacion të realizuar nga SPAK (Prokuroria Speciale Kundër Krimit të Organizuar dhe Korrupsionit), janë sekuestruar dy pasuri të një shtetasi shqiptar, Visar Miftari, i dyshuar për lidhje me aktivitete kriminale të trafikut të drogës. Pas kërkesës nga autoritetet gjermane, Gjykata e Posaçme në Shqipëri ka vënë nën sekuestro një vilë dy katëshe dhe një mjet luksoz “Lamborghini Aventador” në bregdetin e Palasës, pas dyshimeve se pasuritë janë fituar përmes burimeve kriminale.
Hetimi i nisur pas një kërkese nga autoritetet gjermane, që daton që nga marsi i këtij viti, ka zbuluar lidhjet e Miftarit me një grup kriminal të përfshirë në trafikun e lëndëve narkotike, përfshirë kokainën dhe kanabisin. Ai dyshohet se ka vepruar në këtë fushë për pesë vite dhe është akuzuar për përfitime të jashtëzakonshme financiare nga ky aktivitet. Sipas hetimeve, 44-vjeçari është përfshirë në operacione të mëdha të trafikut të drogës në Europë dhe dyshohet se ka fituar të paktën 11.2 milionë euro nga ky aktivitet.
Në vitin 2022, Visar Miftari është dyshuar të ketë blerë një vilë luksoze në Palasë, Shqipëri, me vlerë 260 mijë euro, përmes një transfertë bankare nga Gjermania. Vilë dy katëshe, e cila ka një sipërfaqe të katit të parë prej 72 m2 dhe një parcelë prej 362 m2, është sekuestruar pas dyshimeve se paratë e përdorura për blerjen e saj kanë origjinë nga veprimtaritë kriminale.
Për momentin, hetimet janë në vijim dhe autoritetet po bashkëpunojnë me partnerët ndërkombëtarë për të zbardhur të gjitha pasuritë dhe aktivitetet e dyshuara të këtij individi.
gijotina.com/
Discussion about this post