Pas një ndeshjeje mjaft intensive ndaj bjellorusëve të BATE Borisov, ku Kampionët e Shqipërisë, Partizani arritën të marrin një barazim me lojë të bukur, tashmë lënë gjithçka pas krahëve dhe nisin menjëherë punën për sfidën e dytë, që do të luhet në Hungari të martën e ardhshme në Mezokovesd, duke nisur nga ora 20:00.
Që nga e hëna skuadra e “Demave të Kuq” ndodhet në grumbullim dhe kjo do të vazhdojë deri në ndeshjen ndaj “të verdhëve”. Partizani është vendosur në një nga hotelet pranë stadiumit “Air Albania”, teksa stërvitjet do të vijojë t’i bëjë në impiantin e vet, “Arena e Demave”.
Fatmirësisht nuk ka asnjë dëmtim dhe nga dita e sotme do të nisë misioni për ndeshjen e dytë ndaj BATE-s, që vendos edhe fatin në UEFA Champions League.
Në rast rezultati pozitiv, Partizani kualifikohet në turin e dytë, por nëse ndodh “më e keqja”, kryeqytetasit, do të zbrisnin në turin e dytë të UEFA Europa Conference League.
Discussion about this post