Kryeministri Edi Rama ka nisur me një sërë kritikash dhe porosi takim sot me kryenbashkiakët. Kërkoi nga bashkitë të bashkëpunojnë me kompanitë e ndërtimit për të zhvilluar zona të caktuara. Sipas tij, janë bashkitë ato që duhet të merren me përcaktimin dhe zhvillimin e pronave ku do të ketë ndërtime. Rama u shpreh se në këtë rast ata vrasin dy zogj me një gur duke zgjidhur politikat e strehimit dhe mbledhin më shumë të ardhura. Ndërsa tha se bashkitë rrinë duarkryq, prandaj dhe kanë performancë mjaft të dobët.
“Nuk mund të jetë qeveria përgjigja për çdo kërkesë dhe për çdo nevojë. Rolin e zhvilluesit e luajnë shumë investitorë që nuk kanë fare kompani ndërtimi, Marrin kompanitë e ndërtimit dhe zhvillojnë pronat. Pse të mos e bëjnë bashkitë këtë? Dhe me një gur vrasin dy zogj. Strehojnë personat në nevojë duke bërë politikë strehimi të mirëfilltë dhe nga ana tjetër shesin për të mbledhur të ardhura. Sa janë tregjet bujqësore të prodhimit bujqësor me pjesëmarrje apo pronësi bashkiake? Sa janë pikat e grumbullimit me pjesëmarrje dhe pronësi bashkiake? E shihni pra, një neglizhencë totale”, u shpreh Rama.
Ndërsa po i mësonte ata se si të përfitojnë sa më shumë edhe nga fondet që vijnë nga jashtë, sidomos për bujqësinë, Rama tha se bashkitë janë zhytur në borxhe për shkak të paaftësisë së tyre. “Sa nga ju kanë shfrytëzuar fondin e garancisë sovrane për bujqësinë për të adresuar nevojat e fermerëve në zonat tuaja pa pritur investitorin privat që jo gjithmonë vjen atëherë kur duhet? Për të ardhur te një tjetër gangrenë që është uji? Pse duhet të ballafaqohemi me mangësira për ujin kur bashkitë nuk bëjnë detyrë por bashkëjetojnë me thellimin e borxheve. Dhe kështu kjo pasuri nuk shkon aty ku duhet të shkojë dhe nuk prodhon asgjë tjetër përveçse borxhe, borxhe, borxhe. Pa folur për shërbime të tjera, pastrimin dhe transportin publik që janë shërbime jo të lehta”, tha Rama. Ndërsa paralajmëroi se do të merren masa nëse situata te bashkitë vazhdon në këtë gjendje.
Discussion about this post