Një rrëfim tronditës është publikuar nga tabloidi britanik The Sun, ku flet babai i 29-vjeçares Rebecca Gannon, e cila humbi jetën tragjikisht gjatë një zhytjeje në Sarandë në gusht të vitit 2022. George Gannon akuzon shtetasin shqiptar Saimir Kushova, pronar i një qendre zhytjeje, si personin përgjegjës për vdekjen e vajzës së tij.
Sipas tij, pajisjet e zhytjes që kishte ofruar kompania e Kushovës ishin jashtë standardeve të sigurisë. Ai tregon se që prej asaj dite ka kërkuar drejtësi, por përpjekjet e tij janë kthyer në një makth, pasi është sulmuar dhe kërcënuar disa herë nga persona që pretendon se janë të lidhur me të akuzuarin.
“Më rrahën dhe më thanë të largohesha nga Shqipëria ose do të më vrisnin. Kam brinjë të thyera, por nuk do të dorëzohem kurrë. Dua drejtësi për vajzën time,” tha ai për The Sun.
Babai britanik, i cili ka qëndruar për rreth dy vjet në Sarandë për të ndjekur nga afër procesin gjyqësor, akuzon autoritetet shqiptare për zvarritje, pasi seancat janë shtyrë gjashtë herë brenda një viti.
The Sun shkruan se, Saimir Kushova, i cili më pas u lirua me kusht nga gjykata shqiptare, është arrestuar në Norvegji në vitin 2023 dhe është dënuar me 15 vite burg për trafik droge, si pjesë e një grupi që tentoi të transportonte 150 kilogramë kokainë.
Rebecca Gannon, një zhytëse me përvojë që kishte eksploruar vende të ndryshme në botë, humbi jetën në ujërat e Sarandës, vetëm pak minuta pas nisjes së ekspeditës nënujore. I dashuri i saj, i cili ndodhej me të, rrëfeu se ajo kishte dalë në sipërfaqe “në panik dhe duke kërkuar ndihmë”, por nuk mundi të shpëtohej.
Familja britanike vazhdon të kërkojë drejtësi, ndërsa gjyqi ndaj Kushovës është shtyrë sërish për muajin e ardhshëm. “Vajza ime vdiq dhe askush nuk po mban përgjegjësi. Dua të di pse. Dua drejtësi për Beccie-n time,” përfundon George Gannon.
Discussion about this post