Policia rrugore ka vijuar me kontrollet në akset e vendit, për të evidentuar dhe ndëshkuar përdoruesit e automjeteve që abuzojnë me rregullat e qarkullimit rrugor.
Mësohet se, janë ndëshkuar me gjobë 5345 drejtues mjetesh, për shkelje të ndryshme. Sipas policisë, janë arrestuar 45 shoferë, ndërsa janë pezulluar 228 leje drejtimi, nga të cilat 166 për shpejtësi mbi normat e lejuara, që arrinte deri në 184 km/orë, 56 për drejtim mjeti nën efektin e alkoolit dhe 6 për qarkullim në drejtim të kundërt.
Nga monitorimi me dron dhe patrulla të lëvizshme me makina, gjatë kësaj jave ndëshkuar me masa administrative që varionin nga 7.000 deri 10.000 lekë të rinj, 567 drejtues mjetesh që kanë kryer parakalime të gabuara dhe të rrezikshme në rrugë.
Policia e Shtetit apelon për të gjithë përdoruesit e rrugës në tërësi që të tregojnë kujdes dhe të zbatojnë me rigorozitet rregullat e qarkullimit rrugor.
