Pavarësisht paralajmërimeve të përditshme dhe numrit të lartë të ndëshkimeve, shoferët në Shqipëri nuk ndërgjegjësohen. Gjatë 48 orëve të fundit, Policia Rrugore ka evidentuar në shkelje 668 drejtues mjetesh. Bëhet me dije se, në total janë pezulluar 223 leje drejtimi, nga të cilat 151 për shpejtësi mbi normat e lejuara, 61 për drejtim mjeti nën efektin e alkoolit dhe 11 për qarkullim në krah të kundërt. Policia njofton se secilit prej tyre gjoba do t’iu shkojë në banesë.
Ndër të tjera, bëhet me dije se, gjatë fundjavës nuk kanë munguar as shoqërimet në komisariat, për shoferët e pabindur. Sipas të dhënave të publikuara, në total janë arrestuar 28 shtetas, nga të cilët 21 janë arrestuar për drejtim mjeti në gjendje të dehur (me masë alkooli deri në 3 mg/l). Ndërsa nuk kanë munguar edhe rastet, ku shoferët drejtonin makinën pa pasur patentë, për këtë arsye janë arrestuar 7 persona.
Në këtë kuadër policia e Shtetit apelon për të gjithë përdoruesit e rrugës që të tregojnë kujdes dhe të zbatojnë me rigorozitet rregullat e qarkullimit rrugor dhe fton qytetarët që të denoncojnë nëse konstatojnë shkelje të tilla. Ndërsa evidentohet se, në javët e fundit është rritur numri i shoferëve që shkelin rregullat.
