Pas apeleve të shumta nga policia rrugore për të respektuar sinjalistikat rrugore, shoferët e mjetëve vazhdojnë të qëndrojnë indiferentë duke shkaktuar aksidente me rrezik për jetën e këmbësorëve, si pasojë e shpejtësisë përtej normës dhë manovrave në autostrada. Nisur nga kjo e dhënë, policia rrugore e Tiranës ka shtuar kontrollet në akset kryesore për shoferë të papërgjegjshëm që shkelin rregullat e qarkullimit rrugor.
Prej orës 19:00 dhe deri në orën 24:00, si rezultat i monitorimit me radar në rrugën interurbane Tiranë-Elbasan, konkretisht në Bërzhitë, u konstatuan 11 raste të shpejtësisë tej normave të lejuara që varionin deri ne 159 km/h, ku drejtuesve të automjeteve u është pezulluar Leja e Drejtimit.
Gjithashtu, u konstatuan dhe 19 raste me shpejtësi nga 115 km/h deri në 127 km/h, ku drejtuesit e mjeteve u ndëshkuan me masë administrative 6.000 deri në 12.000 lekë të rinj secili.
Nga monitorimi me alkooltestues në të gjitha rrugët e Tiranës, janë evidentuar dhe arrestuar në kushtetet e flagrancës 4 drejtues mjetesh në gjendje të dehur deri në masën 1.23 mg/l dhe 2 që drejtonin mjetin pa leje drejtimi.
Gjithashtu janë pezulluar 12 Leje Drejtimi për drejtim mjeti nën efektin e alkoolit, si dhe janë vendosur 16 masa administrative me vlerë nga nga 5.000 deri në 15.000 lekë të rinj për drejtim mjeti nën ndikimin e alkoolit.
