Më shumë staf se të dënuar, mbyllen burgjet e Tropojës dhe Sarandës

Dy institucione të vuajtjeve të dënimit u kanë vënë “kyçin” derës duke dalë jashtë funksionit si struktura.

Bëhet fjalë për burgun e Tropojës dhe të të Sarandës. Pas mbylljes së institucioneve të vuajteve të dënimit, të burgosurit janë transferuar në ambiente të tjera.

13 të dënuarit që ndodheshin në burgun e Tropojës janë transferuar në Reç të Shkodrës, ndëra të paraburgosurit janë dërguar në Kukës.

Ndërsa burgu i dytë që është mbyllur është ai i Sarandës ku 15 të burgosurit që ndodheshin në Sarandë janë transferuar në Vlorë, ndërsa të paraburgosurit janë vendosur në Tepelenë.

Transferimi i të burgosurve është bërë nga Policia e burgjeve, në bashkëpunim me efektivët e Policisë së Sarandës dhe Tropojës.

I gjithë procesi ka përfunduar pa asnjë incident. Ndërkohë që pas kësaj këtyre të dy burgjeve, pritet që të mbyllen edhe ai i Vaqarrit dhe burgu i Zaharisë në Krujë.