Nuk ashtë vetëm varfëria e tejskajshme, por edhe modelet që serviren se paratë e shpejta mund të bëhen duke kryer një krim, që e kanë shtyrë një grup minorenësh të planifikojnë grabitje gjatë gjithë muajit dhjetor duke sulmuar bashkëmoshatarë. Ky rast u hetua nga policia dhe u dorëzua në gjykatë për 17 episode vjedhjesh.
“Ne jemi të fortët e sheshit, ne jemi ata që bëjmë terrorin në shesh”. Me këtë frazë, minorenët, që të gjitha nxënës në shkolla të ndryshme, u drejtoheshin me doreza hekuri dhe thika bashkëmoshatarëve të tyre që i pikasnin në distancë duke i përzgjedhur nga veshja që ata mbanin. Idenë për të grabitur fëmijë të moshës së tyre sepse sikurse deklaroi njëri prej tyre, ata frikësoheshin lehtë e dha njëri nga të miturit që u tha shokëve “duhet të bëjmë para”.
Përditë, duke mos hezituar, fëmijët zgjidhnin errësirën dhe zonën nga sheshi Skënderbej deri pranë AKSHI-t dhe pasi drejtonin armët e ftohta pyesnin: Sa lekë ke me vete.
Por vetëm njëri prej tyre u ngarkua me përgjegjësi, ai është 17 vjeç, tre të tjerët të moshës 14 vjeç shpëtuan për shkak të drejtësisë miqësore për minorenë.
17-vjeçari sipas dosjes që iu tregua Top Channel rrëfen se prindërit e tij po divorcohen dhe muajt e fundit nënë e bir lëvizën në shtëpi të ndryshme me qera, pasi nuk kishin para të paguanin.
Ai u lut që t’i jepnin mundësi të shkojë në shkollë.
Për 17-vjeçarin, gjykata vendosi detyrim paraqitje, ndërsa për 14-vjeçarët emrat e tyre thjesht janë shkruar në kartelat e policisë kriminale.
TOPCHANNEL
Discussion about this post