I riu nga Tirana me emrin Kozak Braçi, i njohur ndryshe si “mbreti i Instagramit”, i cili disa ditë më parë u rrëmbye nga 4 persona për shkak të një sherri që kishte nisur nga rrjeti social me të dënuarin me burg përjetë në Greqi, Fabio Dushku, ka rrëfyer sot para policisë gjithë incidentin.
Kozak ka pretenduar se është zënë pritë në hyrje të banesës nga 20 vetë të armatosur, ku këta të fundit e kanë ndjekur, teksa ai po hipte në një taksi. Më tej ai ka treguar se me kërcënimin e armës, e futën me forcë në një makinë tip Golf, ku e goditën me grushta.
“Më kanë ardhur 20 veta, më kanë ruajtur dhe më pritën këtu poshtë sa dola nga shtëpia. Mora taksi sepse do ikja në studio. Sa hipa në taksi, në vendin e pasëm të saj. Përpara makinës me del një makinë tip Benz ML. Tentuam të iknim dhe na dolën dhe dy makina të tjera e na përplasën. Taksisti ndaloi, dyert ishin të mbyllura. Ata shqyen dyert dhe më nxorrën prej aty. Ishin 20 veta me armë në dorë. Me qëlluan në taksi dhe më futen me zor në makinën e tyre. Më futen në një Golf5 të zi. Më vunë pistoletën në trup dhe thikën në fyt. Fillimisht me futën shtrirë në makinë. Unë i binda me fjalë ata dhe më lanë pastaj të lirë”, ka treguar i riu.
Ai ka pretenduar se shpëtoi nga duart e tyre pasi i bindi me fjalë.
“I binda me fjalë se jam psikolog, edhe pistoletën ta kem në gojë m’u s’me vrasin se i bind me fjalë mos me m’vra. Më lanë atje në pyll dhe kam ardh me atë Danielin, vëllain e Fabios dhe një djalë tjetër poshtë, se ata tjerët nuk erdhën. Poshtë erdha me Danielin edhe më tha madje a do lekë, a të të japim naj gjë se u trembën edhe ata…. M’u s’më kanë bo asgjë, m’u veç më kanë marrë me armë. Se me armë të marrin o bisha…”– ka treguar ai.
Kozak Braçi, i cilësuar si “mbreti” i Instagramit u mor peng mbrëmjen e së enjtes nga disa persona. Dyshohet se autorët kanë lidhje me një tjetër personazh të njohur me Fabio Dushkun, i cili ndodhet në burg në Athinë. Konflikti virtual mes grupeve duket se është i hershëm, pasi rezulton se në dhjetor të vitit 2020 në një video online teksa dy të rinj bisedonin me njëri-tjetrin ofronin 5 mijë euro për të rrahur Kozak.
