Mundësi me pasaportë shqiptare, Chermen Valiev është shpallur sot pasdite kampion i Europës në peshën 74kg të stilit të lirë, në Kampionatin Europian që po zhvillohet në Bratislavë të Sllovakisë.
Në finalen ndaj rusit Zaurbek Sidakov, mundësi kuqezi fitoi 4-2 pas një sfidë të ekuilibruar e me shumë emocione. Madje gjithçka u vendos pas rishikimit të pamjeve, që i dhanë suksesin mundësit shqiptar.
Një rezultat i shkëlqyer i Valiev, sportisti që i dha Shqipërisë vjet në Paris medaljen e parë olimpike. Këtë herë, ai shkon deri në fund, duke marrë medaljen e artë, një tjetër rezultat i jashtëzakonshëm për të dhe mundjen shqiptare.
Në sfidat e mëparshme në këtë Europian, Valiev fitoi fillimisht 10-0 ndaj bullgarit Ramazan Ramazanov (çerekfinale), duke u kualifikuar në gjysmëfinale, ku fitoi 6-0 ndaj azerit Aghanazar Novruzov.
Discussion about this post