Në kampin e Manchester City po ndihen të lehtësuar. Klubi anglez, i cili është nën hetim për dyshime mbi parregullsitë financiare dhe shkeljen e rregullave të “fair play financiar” të Premier League, pritet të njhet me vendimin e komisionit të pavarur që po shqyrton këto anomali ekonomike.
Haaland, themeli i projektit
Rinovimi i kontratës së Erling Braut Haaland është një tregues se Manchester City nuk do të ndëshkohet ashpër, duke iu hequr titujt apo zbritur në një kategori më të ulët, siç ishte spekuluar. Sipas “The Athletic”, vazhdimësia e norvegjezit konsiderohet si sinjal që dënimi nuk do të jetë aq i rëndë sa pritej.
“Askush nuk e di me siguri për momentin, por Manchester City gjithmonë ka shfaqur besim. Disa njohës të situatës mendojnë se dënimi me të cilin përballet klubi nuk do të shkojë më tej se një gjobë. Kjo mbetet për t’u parë, por aktivitetet e fundit të klubit në lidhje me transferimet dhe rinovimet duket se pasqyrojnë këtë ndjesi”, – thekson “The Athletic”.
Vendimi përfundimtar, ndoshta në mars
Informacioni sugjeron se një vendim përfundimtar pritet në mars. Çështja e Manchester City përfundoi në fazën e gjykimit në dhjetor, ndaj vendimi ishte planifikuar për fundin e këtij muaji janar. Megjithatë, shpallja e verdiktit mund të vonohet nëse Premier League vendos të paraqesë kundërshtime.
Rinovimet dhe investimet
Lëvizjet e Manchester City gjatë kësaj merkatoje dimërore tregojnë se në zyrat e “Etihad Stadium” nuk ka shqetësim të madh. Përkundrazi, klubi po punon për të përforcuar një skuadër që po plaket dhe është i gatshëm të investojë më shumë se 200 milionë euro për lojtarë si Marmoush, Reis, Cambiaso dhe Khusanov.
Rinovimi i kontratës së Pep Guardiolës deri në vitin 2027 është një tjetër dëshmi e besimit të plotë të klubit se nuk do të ketë ndëshkim sportiv. Edhe pse Guardiola ka deklaruar se do të vazhdonte ta drejtonte ekipin edhe nëse do të binte nga kategoria, ky skenar duket gjithnjë e më pak i mundshëm.
Discussion about this post