Mediat gjermane: Strategu i fushatës së Trump do rrëzojë edhe kryeministrin shqiptar, Edi Rama

Media të shumta gjermane po i bëjnë jehonë zgjedhjeve shqiptare. Franfkurter Rundschau raporton se ‘maestroja’ i fushatës së Trump do të rrëzojë kryeministrin shqiptar

Nga Christian Stoer, FR

Nga po shkon Shqipëria?

Rezultati i zgjedhjeve në Shqipëri konsiderohet vendimtar për rrugën e mëtejshme të vendit drejt anëtarësimit në Bashkimin Evropian.

Kush mund të shpresojë për fitore?

Dy parti dhe aleanca janë në garë për fitoren: Kryeministri aktual Edi Rama (Partia Socialiste) ka shpallur synimin për të vazhduar përpjekjet për anëtarësimin në Bashkimin Evropian deri në vitin 2030.

Rivali i tij kryesor është ish-kryeministri dhe ish-presidenti i djathtë Sali Berisha, i cili udhëheq një aleancë opozitare me një slogan elektoral të frymëzuar nga presidenti amerikan Donald Trump për një “Shqipëri madhështore”.

Guru-ja i fushatës së Trump-it synon ta çojë Berishën drejt fitores

60-vjeçari Edi Rama synon një mandat të katërt si kryeministër. Në fushatën zgjedhore, kreu i Partisë Socialiste vuri në dukje përfitimet e anëtarësimit në Bashkimin Evropian: Sipas tij, dyert e hapura për në Bruksel janë çelësi për t’u mundësuar të gjithë shqiptarëve të gëzojnë “të njëjtat të drejta si qytetarët e vendeve të tjera evropiane”.

Kundërshtari i tij, Sali Berisha, pas dymbëdhjetë vitesh në opozitë, dëshiron të rikthehet në pushtet. 80-vjeçari është paraqitur si një udhëheqës i fortë dhe fokusohet te ringritja ekonomike: “Ne jemi të vetmit që mund ta rikthejmë në jetë ekonominë e vendit, të vetmit që mund ta çojmë përpara Shqipërinë,” deklaroi ai.

Megjithatë, Berisha është në shënjestër të drejtësisë shqiptare për akuza korrupsioni. Për shkak të dyshimeve se ka lidhje me krimin e organizuar, atij i është ndaluar hyrja në SHBA dhe në Mbretërinë e Bashkuar që nga viti 2021.

Berisha shpreson për një kthesë: Me këshilltarin e Trump-it drejt fitores në zgjedhjet shqiptare? 

Partia e Berishës ka angazhuar posaçërisht për fushatën zgjedhore strategun amerikan të fushatave, Chris LaCivita, i cili bashkë me Susie Ëiles udhëhoqi fushatën e Donald Trump për zgjedhjet presidenciale në SHBA në vitin 2024.

“Gjatë dy viteve të fundit, Chris LaCivita ka këshilluar dy figura të mëdha politike në dy vende të ndryshme,” citoi gazeta amerikane Politico zëdhënësin e Partisë Demokratike në Shqipëri, Alfred Lela: “Donald Trump dhe Sali Berisha.”

Sipas Lelës, të dy burrat kanë “profile jashtëzakonisht të ngjashme”. Ata janë ndjekur nga institucione brenda dhe jashtë vendit dhe janë paraqitur si “të jashtëm të rrezikshëm” që duhej të eliminoheshin me çdo kusht nga politika.

LaCivita ka një objektiv të qartë: “Me një demokraci të lulëzuar dhe një miqësi të vërtetë me Amerikën, mund ta bëjmë sërish Shqipërinë madhështore,” tha ai në një aktivitet në fillim të kësaj fushate.

Këshilltari i Trump-it e quan kryeministrin “kukull të Soros-it” përpara zgjedhjeve në Shqipëri 

Të njëjtin ton mbajti edhe gjatë një konference për shtyp në shkurt: “Ne duam të ndihmojmë në zgjedhjen e një kryeministri që është një mik i vërtetë i Shteteve të Bashkuara dhe që do të bashkëpunojë me sukses me Presidentin Trump dhe SHBA-të,” tha LaCivita në atë kohë në Tiranë. Ai e quajti Ramën “kukull të George Soros-it” dhe shtoi: “Nuk mund të jesh njëkohësisht kukull e George Soros-it dhe mik i Shteteve të Bashkuara.”

Sipas Politico, në ekipin këshillues të LaCivitës për Berishën përfshihet edhe Paul Manafort, i njohur si drejtues i fushatës së Trump-it në vitin 2016. Manafort është dënuar dy herë për evazion fiskal, mashtrim dhe konspiracion. Në total, ai u dënua me 7.5 vite burg. Trump e fali atë në dhjetor të vitit 2020.

Sondazhet për zgjedhjet në Shqipëri tregojnë socialistët në epërsi – këshilltari i Trump-it shpreson për një kthesë 

Megjithatë, sondazhet tregojnë se Partia Socialiste në pushtet mund të fitojë rreth 48% të votave, ndërsa aleanca e Berishës ndodhet më shumë se dhjetë pikë përqindje prapa. Megjithatë, besueshmëria e ulët e sondazheve në Shqipëri mund të sjellë ende një surprizë.

Për herë të parë në një zgjedhje parlamentare, shqiptarët që jetojnë jashtë vendit mund të votojnë me postë. Sipas të dhënave të Komisionit Qendror të Zgjedhjeve, 245.935 persona nga diaspora janë regjistruar. Edhe për këtë arsye, nuk është e qartë nëse sondazhet për zgjedhjet në Shqipëri janë të besueshme.