Mediete zvicerane kanë publikuar sot disa artikuj në lidhje me arrestimin e zyrtares serbe, Dijana Hrkaloviç, ku shkruajnë se nuk është e vetmja që duhej vënë pas hekurave. Në artikujt me tituj “Pse zonja e çeliktë duhet të qëndrojë prapa hekurave”, “Der Bund” dhe “Tagesanzeiger”, mediet zvicerane thonë se edhe presidenti serb Aleksandar Vuçiç me ministrin e brendshëm Nebojsha Stefanoviç janë të lidhur direkt me mafian, dhe se aktualisht janë në një “luftë” të ndjekur nga i gjithë kombi.
Në njërin nga nëntitujt shkruhet “Mafia dhe policia në Serbi”, dhe aty shpjegohet se Dijana Hrkaloviç e ndërtoi karrierën e saj në Ministrinë e Brendshme, si dikush që komunikonte drejtpërdrejt me qarqet mafioze dhe kryente punët e pista të Nebojsha Stefanoviçit.
Në tekst përmendet edhe Veljko Belivuk, por edhe Aleksandar Vuçiç, kur thuhet se në televizion ka paraqitur detaje të neveritshme të krimeve të Belivuk-ut, për bluarjen e mishit, prodhimin e qebapëve nga pjesët e trupit të njeriut dhe të ngjashme. Autori i tekstit shprehet i tmerruar nga ajo që ka parë në mediat serbe pro regjimit të Vuçiçit. Më tej ai shpjegon ngritjen e Dijana Hrkaloviç. Pretendon se të njëjtat media pro regjimit dikur e lavdëronin dhe e quanin “Zonja e çelikut”, ndërsa sot e “shkatërrojnë” dhe i bëjnë tekste për të brendshmet dhe fotot nudo. Autori i quan mediat pro regjimit një “makinë të së keqes” që është gati ta shkatërrojë jetën e kujtdo që përbën rrezik për regjimin.
Akuza ndaj Vuçiç janë më të rënda, madje në këto artikuj citohen si pjesë të botës së krimit edhe familjarë të tij, konkretisht i biri Danilo Vuçiç. Teksa kujtojnë disa foto të publikuara më parë nga gazetat serbe, mediet zvicerane shkruajnë se në të njëjtat foto ku ndodheshin anëtarët e klanit Belivuk, shihet edhe Danilo Vuçiç. Sipas medieve, arrestimi i Dijana Hrkaloviç është paralajmërim për të gjithë të tjerët.
Discussion about this post