Rreth 11 persona kanë rënë në pranga, mes tyre gjashtë shqiptarë pasi akuzohen se janmë pjesë e një grupi kriminal që merrej me trafikun e kanabisit e të kokainës. Mediat italiane shkruajnë se arrestimet janë kryer në kuadër të operacionit të koduar “Zemra”, në provincat e Barit, Foggia-s dhe Lombardi, nga Drejtoria Hetimore Antimafia.
Nga hetimet e koordinuara, hetuesit italianë kanë dalë në përfundimin se grupet kriminale shqiptare kanë zhvendosur prodhimin e drogës nga Shqipëria në krahinat e Barit dhe të Foggia-s. gjatë operacionit u shkatërruan dy plantacione me mbi 8000 bimë marijuanë, me peshë mbi një ton e gjysmë, nga të cilat do të ishte e mundur të merreshin mbi 10.000 doza droge për t’u hedhur në treg.
Gjithashtu në banesat e të arrestuarve, gjashtë shqiptarë e pesë italianë, u gjetën 140 kg hashash, gjysmë kilogram kokainë të pastër e 113 kilogramë marihuana. Dy pistoletave të kalibrit 9 me numër serial të gërryer u sekuestruan gjithashtu.
Operacioni “Zemra” është vazhdim i projektit më të gjerë të Antimafias së Barit për luftën ndërkombëtare kundër trafikut të drogës nga Shqipëria në Puglia, i nisur në vitin 2017 me një grup të përbashkët hetimor në bashkëpunim me Prokurorinë e Posaçme Kundër Korrupsionit dhe Krimit të Organizuar në Tiranë dhe Eurojust, të cilat, ndërmjet viteve 2018 dhe 2021, bënë të mundur arrestimin e 118 personave dhe sekuestrimin e rreth gjashtë tonë drogë.
Discussion about this post