Analisti shqiptar nga Maqedonia e Veriut, Kim Mehmeti, ka komentuar lëvizjen studentore të studentëve shqiptarë në Shkup për gjuhën shqipe.
Mehmeti shprehu se tërheqja e ambasadorit të Shqipërisë në Shkup, Denion Meidani do të ishte turp për Tiranën.
Sipas tij, kjo lëvizje do i jepte fund zërit studentor se dhe paralelisht do i jepte vrull dhe zemër grupeve anti-shqiptare.
“Ky në të vërtetët është zëri i munguar i shqiptarisë. Kështu duhet të flasë shqiptaria, duhet të flasë nëpërmjet vrullit rinor. Pastaj ndalemi te kjo pjesa tjetër.
Tirana është treguar inferiore në këto çështje deri para ardhjes së këtij ambasadori në Shkup. Tirana zyrtare e mësoi palën maqedonase që këtu të dërgojë ambasadorë teknikë që janë për dasma dhe synetllëqe. Që nuk merren me shqiptarinë, që merren me partitë shqiptare dhe i mësojnë partitë shqiptare të mbajnë anën e partisë shqiptare që është në qeveri. Aq sa që një ambasador i Shqipërisë gjithë neve që e kritikonim BDI-në, na shpalli tradhtar të kombit.
Pse e them këtë, sepse i mësuar kështu u krijua një përshtypje që ne jemi popull pa mëmëdhe. Se në fund të fundit nëse Tiranës nuk i intereson për shqiptarët, kujt duhet t’i interesojë. Mos vallë Këtu duhet ambasadorë si ata të mëparshmit, që këtu ndodhte Kumanova, ndodhte Sopoti dhe vrasja e shqiptarëve, ata dilnin dhe jepnin deklarata si të ishin përfaqësues të Kombeve të Bashkuar. Unë e kam thënë dhe do e them, kur flet ambasadori i Shqipërisë në Shkup, Shkupi duhet të dridhet.
Unë e di, e di këtë, nuk jam naiv, që Maqedoni a ankohet menjëherë te ndërkombëtarët se gjithmonë ajo ka përfituar nga një ankesë e saj te ndërkombëtarët, që atë e destabilizojnë shqiptarët. Po kurrë ajo Shqipëri dhe ajo Prishtinë nuk i thanë ndërkombëtarëve që elita maqedonase nuk e do një Maqedoni që flet shqip. Nuk duan Maqedoni ku shqiptari të arsimohet në gjuhën shqipe, nuk duan Maqedoni e cila do të ketë interes të vetëm edhe interesin shqiptar.
Dhe shikojeni nga ky kontekst, nëse ndodh me të vërtetë që ta tërheqin ambasadorin Mejdani nga Shkupi, ky do të jetë një krah i fortë për qarqet anti-shqiptare në Maqedoni. Nëse është i kryer, atëherë është i kryer edhe rrëfimi i zëri studentor, s’do të ketë më zë studentor. Këtu do të marrin vrull qarqet anti-shqiptare, ata që e duan shqiptarin e vdekur.
Është turpi i shqiptarisë edhe nëse kjo realizohet, atëherë përfundimisht ne do të çojmë një sinjal, se Tirana zyrtare ndjehet inferiore ndaj të gjithë fqinjëve edhe më shumë bën llogari se a do jetë e pëlqyer nga maqedonasit dhe serbët, sesa do jetë e pëlqyer nga shqiptarët.
Ajo Tiranë dhe ajo Prishtinë duhet ta masin veten sa janë të pëlqyer nga shqiptarët në luginën e Preshevës, në Maqedoni, në Mal të zi dhe jo se sa janë të pëlqyer nga Beogradi dhe Shkupi.
Sepse nëse ndodh ndryshe, le ta shpallim kryeqendrën e shqiptarisë Beogradin sepse Maqedonia është filiali politik i Beogradit, është përfaqësia politike e tij. Dhe kur bëhet fjalë për shqiptarët ajo zbaton politikën serbe ndaj shqiptarëve”, tha analisti Kim Mehmeti.
Discussion about this post