124 gazetarë nga Afganistani bashkë me familjarët e tyre janë evakuuar nga Afganistani në Meksikë. Lajmin e bëri të ditur ministria e Punëve të Jashtme meksikane. Ata u nisën nga Doha dhe pas një fluturimi që zgjati më shumë se njëzet orë me një aeroplan të Katarit, zbritën në vendbanimin e ri.
“Këta janë njerëz që rrezikuan jetën e tyre për të informuar, të cilët janë të përkushtuar ndaj lirisë së shprehjes, lirisë së shtypit dhe pavarësisë,”- tha Ministri i Jashtëm Marcelo Ebrard në një ceremoni në Aeroportin e qytetit të Meksikës në prani të refugjatëve.
Meksika ka një traditë të gjatë të strehimit të refugjatëve politikë. Politikanët të cilët u dëbuan gjatë diktaturës Franko në Spanjë ose nga vendet e Amerikës së Jugut kanë gjetur më parë strehë në Meksikë.
