Nga Lutfi Dervishi
Sikur Melania të ishte me origjinë shqiptare, vendi sot do të ishte në festë.
Politika, akademia dhe shoqëria civile do të mobilizoheshin për të festuar këtë ngjarje madhore, duke harruar për disa ditë ngjarjet e mëdha të ditës si Primaret në PD dhe tërheqjen e Alibeut nga rekursi në Gjykatën e Larte.
Në fillim, Kryeministri do t’i ftonte prindërit e Melanisë në Parkun Eden të kryeministrisë, mes palmave dhe oborrit të rregulluar me kujdes, për t’u folur me kompetencë për dhëndrin e tyre të mrekullueshëm. “Ju nuk e njihnin mirë, por Donald është një burrë i madh,” do t’u thoshte ai, “Një vizionar, një patriot, një dhuratë për Europën dhe një njeri që ka kuptuar se fuqia e vërtetë nuk vjen nga politika, por nga real estate, nga ndërtimi i kullave!” Dhe për të vërtetuar afërsinë e madhe mes tij dhe dhëndrit amerikan, do t’u fliste atyre për projektin TTT ngritjen e një hoteli 100-katësh, – “Trump Tirana Tower”.
“Gjynah qe kemi vetëm një ishull se do t’u kishim dhënë më shumë“…
Ndërkohë, në kampin tjetër , shefi i opozitës do t’i priste prindërit e Melanisë me një fytyrë të vrenjtur dhe një zë dramatik:
“Nëse Shqipëria nuk do të ishte nën këtë sundim të narko- mafias, Melania nuk do të kishte ikur. Ajo do të ishte sot një vajzë normale, ndofta jo dhe aq e pasur, por e lumtur në Tiranë!”
Ndërkohë, në kanalet televizive, etimologët popullorë do të shpallnin zbulimin e shekullit: emri Melania në fakt vjen nga fshati Mellan i Dibrës. Kjo, sipas tyre, ishte prova përfundimtare që Trump mbështet SPAK-un dhe luftën kundër korrupsionit. Altin Dumani dhe disa prokurore të tjerë dibrane do të nisnin hetimet ndaj komisionit Xhafa.
“Një dhëndër amerikan me rrënjë dibrane? Do të thotë vetëm një gjë: fundi i korrupsionit në Ballkan është i pashmangshëm!”
Por festa nuk do të ndalej këtu. Ministria e Arsimit do të organizonte një simpozium shkencor, ku mësueset që kishin pasur fatin të edukonin Melaninë do të ndanin sekretet e tyre me koleget. Titulli i simpoziumit? “Si të edukojmë nxënëset tona që të bëhen First Lady në Amerikë!”.
Ndërkohë, Komiteti i Veteranëve do të njoftonte me krenari organizimin e një Akademie Përkujtimore për gjyshin partizan të Melanisë dhe aksionet e tij heroike kundër nazi-fashistëve. Në fakt, sipas arkivave historike, gjyshi i Melanisë ka qëndruar krejt indiferent gjatë luftës, por kjo nuk përbën problem. “E rëndësishme është fryma partizane!” do të thoshte kryetari i komitetit, nip i gjyshit hero që në përfundim të luftes ishte 11 vjeç.
Në këtë atmosferë patriotike dhe epike, nuk mund të mungonte Avokat Ngjela, i cili do të deklaronte në një studio televizive me gjeste të pa harrueshne:
“Martesa e Melanisë shqiptare me Trump-in, kurorëzon politikën e lartë amerikane për krijimin e një shteti të madh shqiptar në Ballkan!”
Moderatorja do të tundnte kokën në shenjë miratimi, ndërsa populli do të mbetej pa frymë nga kjo zbulesë gjeopolitike e nivelit më të lartë.
Edhe shoqnia civile nuk do të mbetej pas. Shoqatat e grave do të organizonin një parakalim madhështor në Bulevardin “Dëshmorët e Kombit” me sloganin:
“Mos rrini kot, bëni dhe ju një vajzë për Amerikën!”
Në fund të gjithë kësaj zhurme patriotike, Melania do të pyetej nga një gazetar shqiptar nëse ndihej krenare për rrënjët e saj. Me një buzëqeshje të përmbajtur, ajo do të përgjigjej shkurt:
“E rëndësishme është që të gjithë të ndihen mirë me origjinën e tyre.”
Kaq do të mjaftonte për të ndezur edhe më shumë debatet në Tiranë.
Discussion about this post