Anija e marinës italiane është nisur mëngjesin e sotëm nga porti i Brindisit me 40 emigrantë drejt Shqipërisë, ku këta persona do të vendosen në qendrat e paraburgimit sipas marrëveshjes së Romës dhe Tiranës për emigrantët.
Bëhet fjalë për emigrantë të disa nacionaliteteve, të cilët do të qëndrojnë në qendër në kampin e Gjaderit, transmeton Rai.
Vendimi për transferimin në Shqipëri është marrë pas miratimit të një dekreti më 28 mars, i cili lejon transferimin jo vetëm të azilkërkuesve të përgjuar në det, por edhe të emigrantëve të parregullt, të cilëve komisariati i policisë u ka dorëzuar vendimin për dëbim.
Qeveria italiane më pas njoftoi se do t’i transformonte qendrat e paraburgimit të emigrantëve që kishte ndërtuar në Shqipëri në një qendër riatdhesimi për azilkërkuesit e refuzuar, në një përpjekje për të kapërcyer pengesat ligjore që pengojnë përdorimin e ambienteve.
Gjyqtarët italianë kanë anuluar vazhdimisht vendimet për transferimin në Shqipëri të emigrantëve të ardhur në Itali nga deti.
Qeveria italiane ndërtoi kampe për emigrantët në Shqipëri dhe ishte planifikuar të priste rreth 36 mijë burra që kërkonin azil çdo vit dhe për të gjithë planin llogaritet të shpenzoheshin rreth 600 milionë euro.
Discussion about this post