Trajneri i skuadrës së Skënderbeut, Migen Memelli ka theksuar pas barazimit me Egnatian se kishin udhëtuar drejt Rrogozhinës për të fituar ndërsa u shpreh i zhgënjyer për këtë rezultat.
“Erdhëm për të fituar! Vuajtëm në 15 minutat e para edhe për shkak të erës që Egnatia kishte në favor. Ajo ç’ka më kënaq sot nga skuadra është shpejtësia që kishim me topin. Përveç rastit të fundit, në gjithë pjesën të ndeshjes kemi qenë superiorë. Por duhet të jemi më konkret te pasi i fundit dhe përpara portës. Me atë ç’ka treguam sot, këtu mund të merrnim më tepër, gjithsesi riskuam që të shënonim me standarten në fund. Gjithsesi edhe mund të ishim ndëshkuar.
Detyra jonë si trajnerë është që ta nxjerrim skuadrën përpara portës. Reagimi është determimant. Patëm shumë raste, por nganjëherë në futboll duhet të kesh edhe fat. Rastet i patëm goxha të mira. Nuk erdhëm si inferiorë, por si skuadër që kërkon të dominojë. 70 % e ndeshjeve kanë dalë barazim. Nuk qëndron ajo që trajnerët nuk duan të humbasin. Ne futemi në fushë për të fituar.
Zguro vjen nga një dëmtim shumë i rëndë. Nuk është stërvitur gjatë gjithë fazës me skuadrën. Po mundohemi ti japim minuta që ai të përshtatet. Është një lojtar i jashtëzakonshëm për skuadrën tonë. Nuk i kemi kërkuar që të marrë më shumë përsipër në fazën sulmues, por të jetë i kujdesshëm në fazën mbrojtëse. Do të shikoni një lojtar tjetër, kur të ketë kondicionin e duhur fizik”, u shpreh Memelli.
