Trajneri i Vllaznisë, Migen Memelli, është shprehur pas testit parasezonal ndaj Teutës se një përballje e tillë po ndihmon për të krijuar profilin e saj, por edhe disa lojtarë që do të jenë afër skuadrës për të ardhmen. I pyetur nga media sportive “Panorama Sport” se sa i shërbeu ndeshja ndaj Teutës, ai u shpreh:
“Besoj i ka shërbyer të dy skuadrave. Besoj se jemi diku në tri javë para startit të kampionatit. Të dy skuadrat bënë një lojë shumë të mirë. Ajo që na vlejti është se skuadra po konsolidohet në lojë. Pamë disa strategji dhe po ashtu shikuam se si mund të qasemi në ndeshjet jashtë.
Ne po bëjmë një skuadër nga fillimi. Vetëm Juriç e Balaj kanë pasur ndeshje së bashku nga këto që u aktivizuan, ndërsa këto takime na vlejnë për t’u lidhur me njëri-tjetrin”. Në lidhje me ekipin që ka në dispozicion aktualisht ai tha:
“Ne do të bëjmë edhe dy plotësime të tjera. Ju e patë se kemi probleme në krahun e majtë, por edhe kur nxorëm Bekimin (Balën) nuk e patëm të mundur që ta zëvendësonim me cilësitë e tij. Në këtë dy pozicione po kërkohet për lojtarë cilësorë”, ka deklaruar tekniku kuqeblu, Migen Memelli.
Një nga lojtarët që duket se po shqetëson seriozisht teknikun Memelli është pikërisht gjendja e mbrojtësit të majtë dhe kapitenit njëherësh Esin Hakaj. Dëmtimi i tij ka ardhur në një moment të pavolitshëm, duke sjellë jo pak dhimbje koke te drejtuesit e ekipit. Pritet megjithatë që të jetë gati për startin e Superiores.
Discussion about this post