Pas masakrës së Velipojës, ku mbetën të plagosur dy persona dhe të vdekur 4 të tjerë, mes tyre një 20-vjeçar, qeveria ende nuk ka dalë me një plan zyrtar për menaxhimin e vijës bregdetare.
Ministrja e Turizmit dhe Mjedisit, Mirela Kumbaro u shpreh se vija bregdetare është prioritet i këtij mandati, por ende nuk është gjetur një kornizë rregullatore e posaçme për bregdetin.
“Jemi ende në mungesë përgjigje të përkufizimit të saktë të hapësirës që përfshihet në vijën bregdetare. Ka një sërë ligjesh dhe aktesh nënligjore, por nuk e gjejnë ende një kornizë rregullatorë të posaçme për bregdetit. Një draft ligj është në këtë proces, me objektiva shumë të qarta: garantimin e zhvillimit të qëndrueshëm të zonës, dhënien e një statusi të veçantë juridik të zonës, përcaktimi i bregut të detit si pronë e patjetërsueshme, ndalimin e ndërtimeve si edhe disiplinimin e ndërtimeve. Në vijim është edhe reformimi i strukturave ekzistuese për ta zgjidhur një herë e mirë këtë mjegullnajë, që problematikat të adresohen më mirë”.
Sipas saj, vija bregdetare është atraksion i madh turistik, ndaj do të ketë një bashkëpunim të ngushtë me bashkitë.
“Vija bregdetare është atraksioni më i madh turistik, ndaj do të ketë një bashkëpunim shumë të ngushtë me bashkitë, ndarje të territorit në rajone monitorimi, krijimin e njësisë suplementare për sezonin e verës dhe planifikimin e stacioneve te plazhit që në dy muajt e parë të vitit. Puna për organizimin e sezonit të ardhshëm turistik në bregdet ka filluar,” u shpreh Kumbaro.
Mirela Kumbaro është emëruar ministre e Turizmit dhe Mjedisit këtë legjislacion, ndërsa nga viti 2013 deri në 2017, ka mbajtur pozicionin e Ministres së Kulturës.
