Shakira u kthye në Spanjë, pas largimit në prill, pas ndarjes nga Gerard Pique.
Ylli kolumbian ndodhet në Sevilje për një rast shumë të rëndësishëm: “Javën Latine të Grammy”, e cila do të ketë kulmin e saj mbrëmjen e 16 nëntorit, natën e ndarjes së çmimeve të mëdha të muzikës latine.
Me rastin e rikthimit të saj në tokën iberike, këngëtarja ka folur në një intervistë të gjatë për portalin “Hola!”, në të cilën ka folur për jetën e saj të re në Miami, marrëdhënien me dashurinë, fëmijët e saj, mësimet e nxjerra në jetën e saj dhe projektet e reja me të cilat po punon.
Shakira e përcaktoi lëvizjen e saj në Florida me fëmijët e saj si “një frymë e freskët”: “Mendova se isha shumë më e brishtë se sa jam”, deklaroi ajo, duke shtuar: “Kam qenë në gjendje të marr atë që kisha lënë pas për shumë vite.” Këngëtarja shpjegoi se edhe fëmijët e saj duket se i pëlqejnë shumë Shtetet e Bashkuara:
“Përshtatja e fëmijëve me jetën e re në Miami më habiti. Nuk i kam parë kurrë fëmijët e mi kaq të lumtur. Ata shkojnë në aktivitetet e tyre jashtëshkollore pa i ndjekur askush. Jo si në Barcelonë, ku çdo ditë kishte paparacë në derë”.
Nëse ka një gjë mbi të gjitha që kohët e fundit i kanë mësuar superyllit, është se sot për të miqësia peshon më shumë se dashuria. Ose në çdo rast lloje të tjera dashurie, si dashuria prej nëne, falë së cilës ajo gjeti forcën për të vazhduar luftën edhe në momentet më të vështira.
Një tjetër burim i madh motivimi është angazhimi i saj në Fondacionin “Pies Descalzos”, me të cilin është e angazhuar në aktivitete të shumta bamirësie për Amerikën Latine.
Dhe pastaj është padyshim muzika dhe një album i ri që do të lançohet: “Po mbyll një album për të cilin jam shumë entuziaste. Shpresoj ta publikoj në fillim të vitit të ardhshëm dhe më pas do të ketë një turne botëror, më i madhi dhe më i rëndësishmi i gjithë karrierës sime.”
Më në fund, kur u pyet se sa i vështirë ishte vendimi për të shprehur ndjenjat e saj ndaj Piqué përmes teksteve të saj, Shakira pranoi:
“Njerëzit në ekipin tim u përpoqën të më bindin të ndryshoja tekstin, por unë nuk jam një diplomat i Kombeve të Bashkuara. Unë jam një artiste dhe mbi të gjitha një grua. Unë kam qenë gjithmonë e sinqertë me veten dhe të tjerët. Nuk mund të jetoj në një botë ku më duhet të fsheh ndjenjat e mia”.
Discussion about this post