Çmimi i Madh i Imolas u anulua për shkak të përmbytjeve në Emilia-Romagna teksa skuadrat tashmë përgatitet për eventin e Principatës së Monakos. Në pistën e qytetit-shtet, sytë do të jenë të gjithë mbi Mercedesin që do të prezantojë ndryshimet e reja në makinë dhe që janë kërkuar me aq shumë këmbëngulje nga ana e anglezit Lewis Hamilton.
Me thënë të vërtetën, një nga ndryshimet që lidhet me pjesën aerodinamike është frymëzuar nga RedBull. Gjermanët në këtë aspekt do të duhet të kopjojnë austriakët teksa ndryshimet në anësoret e makinës Mercedes do të mund të shihen edhe me sy të lirë.
Ndërkohë, një tjetër aspekt është edhe tërheqja pas e ulëses së pilotit. Lewis disa herë është ankuar në lidhje me këtë detaj duke theksuar se ishte e vështirë të pilotohej duke qenë se gjatë gjithë kohës kishte sytë tek gomat e tij të mëparme.
Drejtori i Mercedes, Toto Wolff është shprehur më parë se Hamilton i ka bërë të qarta kërkesat e tij dhe se ata do të mundoheshin të kënaqnin pilotin. Tashmë, që ndryshimet janë bërë realitet mbetet për t’u parë si do të reagojë Mercedesi në pistë dhe a do të mundet të rivalizojë “Demin e Kuq” Max Verstappen që edhe në këtë sezon duket i pakapshëm.
Discussion about this post